پارێزگاری سلێمانی: رێگری له‌به‌رزبوونه‌وه‌ی نرخی سوته‌مه‌نی ده‌كه‌ین

پارێزگاری سلێمانی رایگه‌یاند، گرانبوونی نرخی به‌نزین و سوته‌مه‌نی له‌ده‌سه‌ڵاتی ده‌سه‌ڵاته‌ خۆجێییه‌كاندا نیه‌و هه‌وڵده‌ده‌ین رێگربین له‌به‌ربوونه‌وه‌ی نرخی به‌نزین.

د. هه‌ڤاڵ ئه‌بو به‌كر پارێزگاری سلێمانی له‌كۆنگره‌یه‌كی رۆژنامه‌وانیدا رایگه‌یاند: به‌رزبوونه‌وه‌ی نرخی به‌نزین و سوته‌مه‌نی له‌ ده‌سه‌ڵاتی ئێمه‌دا نیه‌و له‌گه‌ڵ وڵاتی كۆماری ئیسلامی ئێران و برا بازرگانه‌كانمان له‌هه‌وڵی ئه‌وه‌داین نرخی به‌نزین و سوته‌مه‌نی له‌وه‌ زیاتر به‌رزنه‌بێته‌وه‌.

وتیشی: وه‌زاره‌تی سامانه‌سروشتییه‌كان بڕیاریداوه‌ له‌هه‌فته‌ی داهاتووه‌وه‌ نرخی به‌نزین و سوته‌مه‌نی كه‌مبكاته‌وه‌و ئێمه‌ش چاوه‌ڕوانی ئه‌و بڕیاره‌ین.

له‌باره‌ی نرخی نان و گرانبوونی نرخی غازیش، پارێزگاری سلێمانی وتی: له‌كۆبوونه‌وه‌ی داهاتووی ئه‌نجومه‌نی وه‌زیران ئه‌و پرسه‌ گفتوگۆی له‌باره‌وه‌ ده‌كرێت و كێشه‌كه‌ چاره‌سه‌ر ده‌كرێت.

ئه‌وه‌شی نه‌شارده‌وه‌ كه‌ گرانبوونی نرخی غاز په‌یوه‌ندی به‌گرانبوونی نرخی دۆلاره‌وه‌ هه‌یه‌و تائێستا غازی ماڵان گرانبووه‌و رێگه‌ش ناده‌ین گران ببێت.

PUKmedia جه‌مال سه‌رگه‌تی