بەغدا.. سەرۆك كۆمار پێشوازی لە ھاوسەرۆكی یەكێتی دەكات

.

د. بەرھەم ساڵح سەرۆك كۆماری عیراق ئەمڕۆ دوو شەممە 16-11-2020، لە بەغدا پێشوازی لە لاھور شێخ جەنگی ھاوسەرۆكی یەكێتیی نیشتمانیی كوردستان كرد و سەبارەت بە دوا گۆرانكارییە ئەمنی و ئابووری و سیاسییەكانی كوردستان و عیراق گفتوگۆكرا.

لە دیدارەكەدا جەختكرایەوە لە گرنگی ھەمەھانگی نێوان  لایەنە سیاسییەكانی كوردستان و عیراق لە پێناو چارەسەركردنی كێشەكان و تێپەراندنی ئەو دۆخە نەخوازراوەی ھاتووەتە ئاراوە، لە رێگای دیاڵۆگی جددی و لێكگەیشتنی ھاوبەش بە ئاڕاستەی كۆتایی ھێنان بە قەیرانەكان لە بەرژەوەندی خەڵك و ھێنانەكایەوەی سەقامگیری ئاسایش و ئابووری و خۆشگوزاری بۆ سەرجەم ھاووڵاتیانی عێراق، بەتایبەتی ھێنانەدی داوا رەواكانی خەڵكی خۆراگری كوردستان.

لە تەوەرێكی دیكەی دیدارەكەدا بیرۆڕا ئاڵوگۆركرا لە بارەی كێشە ھەڵپەسێردراوەكانی نێوان ھەردوو حكومەتی ھەرێمی كوردستان و حكومەتی فیدراڵ، بۆ ئەو مەبەستە بەگرنگییەوە جەختیكرایەوە لە گەیشتن بە رێگاچارەی گونجاو و كۆتایی ھێنان بەو دۆسێیە لەسەر بنەمای دەستوور و یاسا، بە تایبەتی تر پرسی مووچەی مووچەخۆران و بژێوی ژیانی خەڵك و پاراستنی مافی ھاووڵاتیانی ھەرێمی كوردستان وەك ھاووڵاتیانی دیكەی عێراق بێ جیاوازی.

PUKmedia نووسینگەی راگەیاندنی سەرۆكایەتی كۆمار