شۆفێران له‌تۆماركردنی سه‌رپێچییه‌كان ئاگادار ده‌كرێنه‌وه‌

.

ئه‌فسه‌رانی هاتووچۆ هه‌ر سه‌رپێچییه‌ك ببینن له‌كاتی ده‌وامی ره‌سمی بێت یاخود نا، سه‌رپێچییه‌كه‌ له‌سه‌ر شۆفێری سه‌رپێچیكار تۆمارده‌كه‌ن.

موقه‌ده‌م فۆزان فازیل، سه‌رپه‌رشتیاری هاتووچۆی ناوشاری سلێمانی له‌میانی به‌شداریكردن له‌به‌رنامه‌ی فلاش-ی ترافیك ئێف ئێم وه‌ڵامی پرسیاری هاووڵاتیانی دایه‌وه‌ له‌باره‌ی تۆماركردنی سه‌رپێچی له‌رِێگه‌ی ئامێری (PDI)یه‌وه‌و وتی "ئه‌فسه‌رانی هاتووچۆی ناوشار ئامێری PDI-یان پێیه‌ كه‌ ئامێره‌كه‌ 24 كاتژمێر كارده‌كات و ئه‌و ئه‌فسه‌ره‌ له‌ئه‌ركدا بێت یاخود نا هه‌ر سه‌رپێچییه‌ك ببینێت كه‌ له‌لایه‌ن شۆفێرانه‌وه‌ ئه‌نجامبدرێت، به‌ كورته‌نامه‌یه‌ك سه‌رپێچییه‌كه‌ ده‌گاته‌وه‌ به‌ شۆفێری سه‌رپێچیكار".

پێشتر شۆفێران له‌رێگه‌ی ترافیك ئێف ئێم-ه‌وه‌ پرسیاری ئه‌وه‌یان ده‌كرد، كه‌ هه‌ندێكجار سه‌رپێچییان له‌سه‌ر تۆمارده‌كرێت و سه‌رپێچییه‌كه‌ به‌ پسوڵه‌ نییه‌ و له‌رِێگه‌ی كورته‌نامه‌وه‌ پێیان ده‌گات.

له‌باره‌ی برِیاری هاتووچۆ بۆ قه‌ده‌غه‌كردنی جوڵه‌ی بارهه‌ڵگره‌كان بۆ ماوه‌ی یه‌ك سه‌عات رِۆژانه‌ له‌ناو شاری سلێمانی موقه‌ده‌م فۆزان وتی، ئه‌م هه‌فته‌یه‌ رِێنمایی ده‌درێت به‌ شۆفێرانی بارهه‌ڵگر به‌وه‌ی پابه‌ندی برِیاری هاتووچۆی سلێمانی بن و له‌سه‌عات 7:30 ده‌قیقه‌ی به‌یانی بۆ سه‌عات 8:30 ده‌قیقه‌ نه‌یه‌نه‌ ناو شاره‌وه‌، له‌هه‌فته‌ی داهاتووشدا هه‌ر شۆفێرێكی بارهه‌ڵگر پابه‌ندی برِیاره‌كه‌ نه‌بێت رِێكاری یاسایی به‌رامبه‌ر ده‌گیرێته‌به‌ر".

PUKmedia ترافیك ئێف ئێم