مه‌راسیمی ناساندنی كتێبی رامانی مام به‌ڕێوه‌چوو

.

سه‌عات 10:30 به‌یانی ئه‌مڕۆ یه‌كشه‌ممه‌ 7-1-2018 به‌ئاماده‌بوونی ژماره‌یه‌ك له‌ نووسه‌ران و ڕۆژنامه‌نووسان مه‌راسیمی ناساندنی كتێبی رامانی مام له‌ ساڵۆنی كوردستانی نوێ له‌ناو باره‌گای مه‌كته‌بی ڕاگه‌یاندنی یه‌كێتیی نیشتمانیی كوردستان له‌ سلێمانی به‌ڕێوه‌چوو.

له‌وباره‌یه‌وه‌ نه‌وازد عه‌لی ئه‌حمه‌د  تایبه‌ت به‌ PUKmedia ی ڕاگه‌یاند: ڕامانی مام بریتیه‌ له‌ چاوپێكه‌وتنێكی 360 ده‌قیقه‌یی كه‌ هۆمه‌ر شێخ مووس له‌ساڵی 1988 بۆ یه‌كه‌مجار و دواتریش 1990 له‌گه‌ڵ سه‌رۆك مام جه‌لال كردوویه‌تی.

وتیشی: بابه‌تی سه‌ره‌كی ئه‌م كتێبه‌ له‌سه‌ر ده‌وڵه‌ت و ده‌وڵه‌تبوونه‌ و ئه‌و كێشانه‌ی كه‌ ڕووبه‌ڕووی ئێمه‌ بوونه‌ته‌وه‌ كه‌ نه‌توانین دروستى بكه‌ین.  مام جه‌لال له‌م كتێبه‌دا زۆر به‌ وردی و شاره‌زایانه‌ و پسپۆڕانه‌ باسی تێزه‌كانی دروستبوونی ده‌وڵه‌تی كردووه‌. بڕیار بوو زوتر ئه‌م كتێبه‌ بڵاو بێته‌وه‌، به‌ڵام به‌هۆی ئه‌وه‌ی كه‌ 5 ساڵ من له‌سه‌ر كتێبی پشكۆیه‌ك له‌ خۆڵه‌مێش كه‌ تایبه‌ته‌ به‌ ژیانی هۆمه‌ر شێخ مووس كارمكرد ئه‌م كتێبه‌ دوا كه‌وت.

نه‌وزاد عه‌لی ئه‌حمه‌د وتیشى: به‌ڕای من ئه‌و كتێبه‌ ده‌توانێت بۆ  ئه‌وانه‌ی كه‌ له‌سه‌ر ده‌وڵه‌ت كار ده‌كه‌ن یان زانكۆ و ناوه‌نده‌كانی مه‌عریفی و ستراتیژی و ئه‌و شوێنانه‌ی كه‌ كار له‌سه‌ر توێژینه‌وه‌ی زانستی ده‌كه‌ن، ببێته‌ سه‌رچاوه‌یه‌ك، چونكه‌ مام جه‌لال زۆر به‌ وردی و وریايانه‌ له‌و كتێبه‌دا وه‌ڵامی پرسیاره‌كانی داوه‌ته‌وه‌.

ئه‌م كتێبه‌ سه‌رچاوه‌یه‌كی زۆر گرنگه‌ بۆ ئه‌و پرسیارانه‌ یان ئه‌و كێشانه‌ی كه‌ تا ئێستا ڕای گشتی و پسپۆڕان نه‌یانتوانیوه‌ وه‌ڵامیان بده‌نه‌وه‌. به‌ڕای من خوێنه‌ر دوای خوێنه‌وه‌ی ئه‌م كتێبه‌ و كتێبی"اغد دیمقراطی وحرمان شعب من حق تقریر المصیر"  كه‌ مام جه‌لال ساڵی 1987 له‌شاخ نووسیویه‌تی، ئه‌م دوو كتێبه‌ درێژكراوه‌ی یه‌كن، یه‌كیان به‌ زمانی كوردی و یه‌كیان به‌ زمانی عه‌ره‌بی.

له‌كۆتایی قسه‌كانیدا نه‌وزاد عه‌لی ئه‌حمه‌د وتی: هیوادارم ئێمه‌ زیاتر و باشتر ئه‌و ئه‌رشیڤی یه‌كێتی و حزب و ڕێكخراوه‌كانی كوردی كه‌ له‌ده‌ره‌وه‌ی وڵاتن كۆیان بكه‌ینه‌وه‌ و چاپیان بكه‌ینه‌وه‌، چونكه‌ كۆمه‌ڵێ گومان له‌سه‌ر مێژووی حزبی كوردی هه‌یه‌ چونكه‌ ئه‌و كارانه‌ی كه‌ تا ئێستا كراون هه‌مووی جێی پرسیاری گۆماناوی و پرسیاری گه‌وره‌ن ده‌بێت ئه‌و گومانانه‌ بڕه‌وێنینه‌وه‌.

PUKmedia   وێنه‌/ حه‌مه‌ عومه‌ر