Mezlûm Ebdî: Em li Sûriyeyê dikevin qonaxek nû

PUKMEDIA

Fermandarê Giştî yê HSDê Mezlûm Ebdî

Fermandarê Giştî yê Hêzên Sûriya Demokratîk Mezlûm Ebdî ragihand ku, ew li Sûriyeyê dikevin qonaxek nû, saziyên leşkerî û îdarî, di nav de HSD û Rêveberiya Xweser dibe ku guhertinan bibînin.

Bi boneya salvegera 14`mîn a şoreşa 19ê Tîrmehê ya Rojavayê Kurdistanê, Fermandarê Giştî yê HSDê Mezlûm Ebdî, ji radyoya Rojava re axivî û got: Ev roj di dîroka Sûriyeyê û hemû pêkhateyn wê de bûyerek girîng bû, îro em dikevin qonaxek nû, saziyên leşkerî û îdarî, di nav de HSD û Rêveberiya Xweser, dibe ku guhertinan bibînin.

Mezlûm Ebdî got: Destkeftiyên Şoreşa 19ê Tîrmehê niha bi şoreşa Sûriyeyê re dibe yek, ev jî ya hemû gelê Sûriyeyê ye û em îro di Sûriyeya nû de dijîn ku encama têkoşîna hemû Sûriyeyane, tevî gelê Kurd û pêkhateyên cûda yên ku di nav refên HSDê û Rêveberiya Xweser de têkoşîn kirin.

Ebdî, aşkere jî kir ku: Berxwedana li dijî DAIŞê, bi taybetî berxwedana dîrokî ya li bajarê Kobanê, şoreşa Rojava di asta herêmî, Kurdistanî û navneteweyî de ber bi qonaxek nû ve bir. Li Kobanê, Pêşmerge û Şervan bi gelên herêmê re di sekna li hember terorê de bûn yek, û berxwedanek dîrokî nîşan dan û biserketin.

PUKMEDIA