Êrîşên nû li ser Îranê û Qalîbaf piştrast dike ku serdema peymanên yekalî bi dawî bûye

PUKMEDIA

Tengava Hurmuzê

Artêşa Amerîkayê îro Yekşemê bidawîbûna gera sêyem a êrîşên leşkerî yên ku Îranê kiribûn armanc ragihand. Her wiha eşkere kir ku hêzên wê di rojên borî de, weke bersiv li ser êrîşên ku keştiyên bazirganî li Tengava Hurmizê kiribûn armanc, yek ji berfirehtirîn operasyonên asmanî û deryayî li dijî armancên di nav xaka Îranê de pêk aniye, ku zêdetirî 300 baregehên leşkerî li xwe girtine.

Fermandariya Navendî ya Amerîkayê (CENTCOM) di daxuyaniyekê de ragihand ku gera sêyem a êrîşan bi dawî bû piştî ku nêzîkî 140 armancên leşkerî yên Îranê hatin hedefgirtin. Di van lêdanan de firokeyên şer ên ku ji baregehên bejayî û deryayî rabûn, dron û keştiyên şer ên ku cebilxaneyên rast avêtin, hatin bikaranîn.

Li gorî daxuyaniya CENTCOMê, hêzên Amerîkayê di sê şevên li pey hev de, bi fermana rasterast a Serokê Amerîkayê Donald Trump, zêdetirî 300 armancan di nav xaka Îranê de kirine armanc. Hat diyarkirin ku armanca serekî ya operasyonê sînordarkirina şiyana Tehranê ye di armancgirtina deryavanên sivîl û keştiyên bazirganî de, yên ku yek ji giringtirîn rêyên deryayî yên cîhanê bikar tînin.
Her weha tevî gurkirina leşkerî, artêşa Amerîkayê tekez kir ku tevgera keştiyên bazirganî li Tengava Hurmizê hîn jî berdewam e û piştrast kir ku hêzên Amerîkî ji bo ewlekariya derbasbûna keştiyan di vê rêrewa deryayî ya girîng de berdewam in.

Di daxuyaniyê de hat eşkere kirin ku hêzên Amerîkî ji seretaya gulanê ve alîkariya ewlekariya derbasbûna zêdetirî 800 keştiyên bazirganî di tengavê re kirine, her weha derbasbûna zêdetirî 400 milyon bermîlên nefta xam jî parastine, ev yek wekî nîşanekê ye ji bo berdewamiya herikîna hinardekirina enerjiyê tevî alozîyên leşkerî.

Tengava Hurmizê wekî yek ji girîngtirîn rêrewên stratejîk ên cîhanê tê hesibandin, ji ber ku nêzîkî pênceka bazirganiya nefta cîhanê di re derbas dibe, ev yek jî dibe sedem ku her tevlîheviyek tê de rasterast bandorê li ser bazarên enerjiyê yên cîhanê bike.
Ji aliyê din ve, Îranê îro Yekşemê ziman û çalakiyên xwe yên leşkerî gur kirin, piştî ku serokê şandeya wê ya danûstandinan Mihemed Baqir Qalîbaf ragihand ku "serdema peymanên yekalî bi dawî bûye" û hişyarî da Amerîkayê ji encamên tiştê ku wî wekî "pêkneanîna berpirsiyariyên xwe" bi nav kir, ev yek hevxet bû ligel ragihandina Supaya Pasdaran ku êrîş birine ser armancên Amerîkî li Qeter, Omanê û Tengava Hurmizê.

Qalîbaf di daxuyaniyên li ser hesabê xwe yê tora civakî "X" de got: Me ji we re got: Li ser sozên xwe bisekinin an jî berdêla wê bidin. Rastî li derî dixe," ku ev wekî amajeyekê ye ji bo hilweşîna lihevkirinên demkî yên navbera Waşînton û Tehranê piştî nûbûna derbên dualî û girtina Tengava Hurmizê.

Daxuyaniyên wî di demekê de hatin ku Supaya Pasdaran a Îranê ragihand ku hêzên wê yên esmanî "qonaxa sêyem" a bersivdana li dijî derbên Amerîkayê pêk aniye û navendên piştgiriya lojîstîk û platformên sotemeniyê yên keştiyên peywardar ên balafirhilgirên Amerîkî li bendava Duqm a Siltanata Omanê armanc girtine.

PUKMEDIA