Trump: Em nêzîkî rêkeftineke pir baş bi Îranê re ne

Reuters

Donald Trump serokê Amerîkayê

Serokê Amerîkayê Donald Trump got ku ew nêzîkî rêkeftineke pir baş bi Îranê re ne, û tekez kir ku hêzên Amerîkayê dê yekser ji deverê vekişin dema ku Tengava Hormizê ji nû ve were vekirin û pirsgirêka nuklerî çareser bibe.

Di hevpeyvînekê de bi Fox News re, Trump zelal kir ku rêkeftineke dîplomatîk vebijarka herî baş e ji ber ku îmzekirina wê tê wateya vekirina yekser a Tengava Hormizê ji bo gerokiyê. Wî got, "Divê Tengava Hormizê tavilê bê vekirin, bêyî ti gumrikiyê û divê ku qedexe be ku Tehran çekên nukletî hebe ku ev garantiya min ya serekî ye.

Serokê Amerîkayê di axaftina xwe de bi rojnamevan Lara Trump re rave kir ku Îran di rewşek pir xirab de ye û artêşek wê tune ye, tenê gotinên şîrîn û medyaya sexte hene. Wî got, "Me artêş, hêza deryayî, hêza hewayî û berevaniya dijî-balafirî ya Îranê wêran kirine." Trump her çend qebûl kir ku Îranî danûstandkarên pir jêhatî ne û pêvajo dem digire jî, got em hêdî hêdî û bi awayekî domdar tiştê ku em ji Tehranê dixwazin distînin, û heke ev çênebe em ê pevçûnê bi awayekî bi tevahî cûda biqedînin. Got jî: Heke peyman ji bo me ne adil be, em ê vegerin Wezareta Şer.

Serokê Wîlateyên Yekbûyî yên Amerîkayê zêde kir, Me çend caran serokatiya Îranê armanc girtiye, û yên ku mane jî aqiltir bûne. Wî destnîşan kir ku tiştê ku qewimîye dikare wekî guhertina rêjîmê were bi navkirin.

Di heman çarçoveyê de, Aksiyos li ser zara rayedarekî Amerîkî destnîşan kir ku daxwazên dawî yên Trump di navbera Waşnton û Tehranê de bûne sedema dewreyek nû ya danûstandinan, û piştrast kir ku dê bi Îranê re peymanek hebe, lê dema encamdana wê hîn ne diyar e.

Ji aliyekî din ve, çavkaniyên Amerîkî eşkere kirine ku Trump daxwaza guhertina hin bendên di nav reşnivîsa peymanê de kiriye, bi taybetî wan beşên ku têkiliya wan bi çawaniya reftarkirina bi uranyuma dewlemendkirî ya Îranê, dema cîbicîkirina rêkarên teknîkî û vekirina Tengava Hormizê re heye.

Tevî pêşveçûnan, medyayên Îranê ragihandine ku hîna peyman bi dawî nebûye û berpirsekî bilind ê Amerîkî jî diyar kiriye ku ew di çend rojên bê de li benda bersiva Îranê ne.


PUKMEDIA