Dadgehê biryara darvekirinê ji bo Ecac derxist

PUKMEDIA

Tawanbar Ecac Ehmed Herdan,

Îro li Dadgeha Resafeyê rûniştina duyem a darizandina Ecac, celadê Nuqre Selmanê birêve çû û dadwer biryara bidarvekirinê ji bo wî derxist.

Îro pêncşem, 14/5/2026, rûniştina duyem a darizandina Ecac, celadê Nuqre Selmanê li Dadgeha Resafeyê ya Bexdayê birêve çû, di encamê de biryara bidarvekirina Ecac hat dayîn.
Ev di demekê de ye ku pêncşema borî, 7/5/2026, bi amadebûna bi dehan şahid û kesûkarên enfalkiriyan, rûniştina yekem a darizandina (Ecac Ehmed Herdan Tikrîtî) li Dadgeha Resafeyê ya Bexdayê birêve çûbû. Paşê darizandin ji bo îro hatibû paşxistin, bi mebesta temamkirina rêkarên yasayî û guhdarîkirina li gotinên şahidên din.

Her wiha di rûniştina yekem de, 25 gilîker û şahidan li berdem dadwer şahidî dan û gotinên xwe li ser tawanên wî celadî tomar kirin. Piştî guhdarîkirina gotinan, dadgehê biryara paşxistina rûniştinê da. Li gorî agahiyan, bi giştî 221 kes ji parêzgehên Silêmanî, Hewlêr, Duhok, Diyale û Selahedînê wek şahid hatibûn vexwendin da ku di vê dozê de gotinên wan bên wergirtin.

Tawanbar Ecac Ehmed Herdan, yek ji serpereştiyarên girtîgeha Nuqre Selmanê ya li parêzgeha Semawayê ya başûrê Îraqê bû. Roja 31/7/2025 nûçeya girtina wî ji aliyê nivîsgeha Xanima Yekem a berê ya Îraqê ve hatibû ragihandin û daxwaz ji girtiyan, kesûkarên girtiyan û windahiyan hatibû kirin ku ji bo tomarkirina giliyan li dijî wî tawanbarî, pêwendiyê bi wan re bikin.

PUKMEDIA