Daxuyaniyên Trump bihayê petrolê daxist û peymanên pişkan bilind kir

Ajans

Peymanên pişkan li bazarên Amerîkayê

Daxuyaniyên serokê Amerîkayê yên ji bo paşxistina êrîşên li ser wêstgehên karebê û binesaziya enerjiyê ya Îranê, bihayê petrolê daxist û peymanên pişkên li bazarên Amerîkayê jî bi awayekî ji nişkave û berbiçav bilind kir.

Sibeha îro bazarên darayî yên Amerîkayê di peymanên pişkan de bilindbûneke ji nişka ve û berbiçav bi xwe ve dîtin, ev yek piştî wê hat ku Donald Trump, serokê Amerîkayê ragihand: Waşîngton û Tehran di du rojên borî de guftûgoyeke "baş û berhemdar" encam dane. Trump li ser tora civakî ya Truth Social de bal kişand ser wê yekê ku wî biryar daye êrîşkirina ser wêstgehên enerjiyê û binesaziya enerjiyê ya Îranê bide sekinandin.

Bi sedema vê daxuyaniya Trump, pişkên Dow Jones bi rêjeya 1,100 xalan bilind bûn ku dike 2.6% û pişkên S&P 500 û Nasdaq-100 jî rêjeya 2.7% bilindbûn bi xwe ve dîtin.
Li beramber de, li gorî raporeke tora "CNBC" ya Amerîkî, bihayê petrola xam piştî daxuyaniya Trump bi tundî daket, petrola Teksasê zêdetirî 9% daket û bihayê her bermîlekê gihîşt kêmtirî 90 dolarî, her wiha bihayê petrola Brent zêdetirî 13% daket û nirxê wê ji bo kêmtirî 97 dolaran ji bo her bermîlekê kêm bû.

PUKMEDIA