Îran:Emê keştîyên bixwazin ji Tengava Hurmuz derbas bibin gulebaran bikin

AP

Keştiya balafirhilgir ya USS Dwight D Eisenhower ji Tengava Hurmuzê derbasî Kendava Erebî bû

Li gorî medyaya dewleta Îranê,Fermandarekî Sipaha Pasdarên Şoreşa Îranê (IRGC) got:Tengava Hurmuzê girtî ye û hişyarî da ku her keştiyek ku hewl bide derbas bibe dê rastî êrîşê were,

Îbrahîm Cebarî, şêwirmendê payebilind yê fermandarê giştî yê IRGC, roja Duşemê got: Tengava Hurmuzê girtî ye,eger kesek hewl bide derbas bibe, qehremanên Sipaha Pasdaran û hêzên deryayî yên birêkûpêk dê wan keştiyan bişewitînin.

Tehranê wekî beşek ji tolhildana xwe ya ji bo kampanyaya bombebaranê ya Îsraîl û Amerîka ku roja Şemiyê dest pê kir û Rêberê Bilind yê Îranê Ayetulah Elî Xameneyî û rayedarên din yên payebilind kuştin, binesaziya ku ji bo hilberîna wuzeyê ku cîhanê girîng e hedef girtiye.

Cebarî di postekê de li ser kanala Telegramê ya IRGC got: Emê êrîşî boriyên petrolê jî bikin û emê nehêlin ku dilopek petrolê ji herêmê derkeve,bihayê petrolê dê di rojên pêş de bigihîje 200 Dolaran.

Navbirî ji bo ajansa nûçeyan ya nîv-fermî Tesnim got: Amerîkî, bi deynên bi hezaran Milyar Dolaran, bi petrola herêmê ve girêdayî ne, lê divê ew bizanin ku dilopek petrolê jî nagihîje wan.

Tengava Hurmuz - ku bi berfirehî wekî riya herî girîng ya hinardekirina petrolê ya cîhanê tê hejmartin hilberînerên sereke yên Kendavê, di nav de Erebistana Siûdî, Îran, Îraq û ,Îmaretên Yekbûyî yên Erebî, bi Kendava Oman û Derya ya Erebî ve girê dide.

Girtina wê piştî êrîşên Amerîka û Îsraîlê yên li ser Îranê di 28ê Sibatê de hat, ku armanca wan qelskirina serokatiya welêt bû, Serokê Amerîka Donald Trump bi eşkereyî diyar kir ku Washington dê piştgiriyê bide gelê Îranê di hewldanên ji bo rakirina sazûmana olî ya desthilatdar de.

Di bersivê de, Îranê gelek êrîşên mûşekî li ser welatên Kendavê yên ku baregehên leşkerî yên Amerîkî lê ne, di nav de Qeter, Kuweyt û Behrêyn, dan destpêkirin,êrîşên din li dijî Îmaretên Yekbûyî yên Erebî, Erebistana Siûdî û Omanê hatin ragihandin.

Nêzîkî %20ê xerckirina rojane ya petrolê ya cîhanî bi riya Tengava Hurmuz derbas dibe, ku li xala xwe ya herî teng bi qasî 33 kîlometreyan (21 mîl) fireh e, ku ew dike yek ji xalên deryayî yên herî hestyar yên stratejîk yên cîhanê.

Çavkanî: Reuters

PUKMEDIA