Barot: Peymana di navbera HSD û Şamê de mafên Kurdan û şerê li dijî DAIŞê xurt dike

PUKMEDIA

Wezîrê Derve yê Fransayê Jean-Noel Barrot

Wezîrê Derve yê Fransayê ji Şamê piştrast kir ku ewê îro Pêncşemê 5/2/2026an, li Hewlêra paytexta Herêma Kurdistanê, bi Fermandarê Giştî yê Hêzên Sûriyeya Demokratîk (HSD) re bicive. Wî destnîşan kir ku peymana di navbera Hikûmeta Demkî û HSDê de mafên Kurdan û têkoşîna dijî "DAIŞ"ê xurt dike, her wiha piştgiriya Fransayê ji bo avakirina paşerojeke nû ji bo gelê Sûriyeyê ragihand.

Wezîrê Derve yê Fransayê Jean-Noel Barrot, piştî hevdîtina xwe ya bi Wezîrê Derve yê Hikûmeta Demkî ya li Sûriyeyê Esed Şîbanî re li Koşka Tişrîn a Şamê, diyar kir ku ew ê li Hewlêrê ligel Fermandarê Giştî yê Hêzên Sûriyeya Demokratîk Mazlûm Ebdî vê peymanê gotûbêj bike. Barrot amaje bi wê kir ku hevkariya di navbera Hikûmet û HSDê de hewildanên têkoşîna dijî "Rêxistina Dewleta Îslamî" xurt dike û ev yek ji bo Fransayê pêşengiyeke sereke ye.

Wezîrê Fransî tekez kir ku welatê wî dê hemû piştgiriya pêwîst pêşkêşî Sûriyan bike da ku berdewamiya karê hikûmetê mîsoger bibe. Wî destnîşan kir ku Fransa li kêleka gelê Sûriyeyê ye, yê ku îro derfet ji bo wî çêbûye ku paşerojeke nû ava bike.
Serokê dîplomasiya Fransayê îro dest bi geşteke Rojhilata Navîn kir ku bi serdana Şamê dest pê kir. Tê payîn ku serdana Bexda û Hewlêrê jî bike û biryar e sibe Înê bi serdana Beyrûtê dawî li geşta xwe bîne.

PUKMEDIA