Hêzên Amerîkayê li Sûriyeyê êrişî terorîstên DAIŞê kirin

PUKMEDIA

Balafira Hevpeymaniyê

Fermandariya Navendî ya Amerîkayê (CENTCOM), di navbera 27ê Kanûna Paşîn û 2yê Sibatê de, li seranserê Sûriyeyê li dijî gelek armancên DAIŞê pênc êrişên ezmanî pêkanîn, di vê navberê de hêzên hevkar zextên leşkerî didomînin da ku têkçûna herî dawî ya tora terorîst misoger bikin.

Hêzên CENTCOMê, navendeke ragihandinê ya DAIŞê, xaleke lojîstîk a girîng û depoyên çekan rûxandin.
Amîral Brad Cooper, Fermandarê CENTCOMê got: Bordûmankirina van armancan nîşaneya baldarî û biryardariya me ya berdewame ji bo rêgirtina li vegera DAIŞê li Sûriyeyê. Her wiha anî ziman: Karê bi hevrêziya hêzên koalîsyonê û hêzên hevkar re ji bo misogerkirina têkçûna mayînde ya DAIŞê, Amerîka, herêm û cîhanê ewletir dike.

Hêzên Amerîkayê û hêzên hevkar, di bersiva êrişa 13ê Kanûna Pêşîn a par ku li Tedmûrê li dijî hêzên Amerîkî û Sûrî pêk hatibû de, operasyona "Çavê Baz" dan destpêkirin. Di kemîna DAIŞê de du leşkerên Amerîkî û wergêrekî Amerîkî hatibûn kuştin.
Piştî nêzîkî du mehên operasyonên taybet, zêdetirî 50 terorîstên DAIŞê hatin jinav birin an jî girtin. Hêzên CENTCOMê di 16ê Kanûna Paşîn de, di êrişekê de li bakurê rojavayê Sûriyeyê, Bîlal Hesen el-Casim kuşt. Ev fermandarê terorîst rasterast bi wî çekdarê DAIŞê yê berpirsê êrişa 13ê Kanûna Pêşîn re di têkiliyê de bû.


PUKMEDIA