Lihevkirina di navbera HSD û Şamê de bi qedexeya derketina derve re dikeve warê cîbicîkirinê

PUKMEDIA

Heseke

Hevpeymana di navbera Hêzên Sûriya Demokratîk (HSD) û Hikûmeta Demkî ya Sûriyê de îro Duşemê, 2/2/2026, dikeve ware cîbicîkirin ku li gorî wê hêzên ewlehiyê yên ser bi Wezareta Navxwe ya Hikûmeta Demkî li xalên diyarkirî di hundirê bajarên Hesekê û Kobanî de di roja diduyên a Sibatê de bi cih dibin.

Hêzên Sûriya Demokratîk û Hikûmeta Demkî di 30ê Çileya borî de gihîştibûn peymaneke giştî ya agirbestê, ku têgihiştinên li ser pêvajoyeke rêzeyî ya yekkirina hêzên leşkerî û îdarî di navbera her du aliyan de dihewîne.
Peyman vekişîna hêzên leşkerî ji xalên rûbirûbûnê, ketina hêzên ewlehiyê yên ser bi Wezareta Navxwe bo navenda bajarên Hesekê û Qamişlo, û destpêkirina pêvajoya yekkirina hêzên ewlehiyê li herêmê li xwe digire. Her wiha, peyman li ser avakirina lîwayeke leşkerî ku sê tîmên Hêzên Sûriya Demokratîk pêk tê, tevî avakirina lîwayeke taybet bi hêzên Kobanî di çarçoveya tîmeke ser bi parêzgeha Helebê de, pêk tê.
Di peymanê de yekkirina saziyên Rêveberiya Xweser di nav saziyên dewleta Sûriyê de tevî çespandina karmendên sivîl jî heye.

Her wiha li ser sererastkirina mafên sivîl û perwerdehiyê yên gelê Kurd û misogerkirina vegera koçberan bo herêmên wan li hev hatiye kirin.
Peyman armanc dike ku axa Sûriyê yek bike û pêvajoya yekbûna temam li herêmê bi rêya bihêzkirina hevkariya di navbera aliyên peywendîdar de û yekkirina hewildanan ji bo avakirina welat pêk bîne.
Di çarçoveya pêkanîna bendên lihevkirinê de duh ( 1 Sibat 2026) şandeyek nûnerên hêzên ewlekariya hundirîn ên Helebê serdana Kobanê û bi rêveberiya Asayîşê re hevdîtin kirin. Di hevdîtinê de rewşa ewlehiyê, vekişîna QSD’ê, amadekariyên entegrekirina Asayîşa Kobanê di nava rêveberiya Hêzên Ewlekariya Hundirîn a parêzgeha Helebê de hatin nîqaşkirin. Şandeyek din bi heman armancê serdana Hesekê û Qamişloyê kir.

Duh Asyîşa Kantona Cizîrê bi armanca parastina ewlehiya herêmê qedexeya derketina derve li bajarên Hesekê û Qamişloyê ragihand. Li Heseke qedexe îro (duşem 2 Sibat 2026) dest pê kir û li Qamişloyê jî sibe dest pê dike. Asayîşê bang li şêniyan kir ku li gorî biryarê tev bigerin.

Neteweyên Yekbûyî, DYA, Frans, Brîtanya, Misir, Erebistana û hin welatên din piştgirî da lihevkirina QSD û hikumet demkî û wekî gaveke girîng ber bi kêmkirina rageşiyê li Bakur û Rojhilatê Sûriyeyê ve bi nav kir. Her wiha banga pêkanîna lihevkirinê û rêzdariya li hemberî agirbestê kir.

PUKMEDIA