Encamnameya Konferansa Destpêşxeriya Yekîtiya Jinên Kurd li Ewropayê

ANF

Dîmenek ji konfransa jinan

 Encamnameya Konferansa Destpêşxeriya Yekîtiya Jinên Kurd li Ewropa ya li Hollanda hatîlidarxistin, hate eşkerekirin ku têde hatiye: Armanca konferansê avakirina yekîtiya neteweyî ya jinên Kurd yên li Ewropa ye.

Roja 13’ê Kanûna 2025’an li Hollanda Konferansa 1’emîn ya Yekitiya Neteweyî ya Jinên Kurd ya Ewropa bi beşdariya 154 jinên Kurd hat lidarxistin.

Encamname bi vî rengî ye:

Ji bo pêşeroja jinên Kurd li Ewropa di konferansa 1’emîn ya Destpêşxeriya Yekitiya Jinên Kurd li Ewropa de ev biryar hatin girtin:

1. Di konferansê de biryar hat girtin ku Yekîtiya Netewî ya Jinên Kurd a li Ewropa êdî wek platform kar û xebatên xwe bimeşîne.

2. Biryar e ji bo bi rêvberiya kar û xebatên platformê rêveberiyeke ji 21 kesan pêk tê were hilbijartin.

3. Jinên Kurd li Erwropa li hemberî hemû şewazên êriş, destdirêjiyên li ser nirxên jinan û neteweyî hişyar in û xwedî helwest in, ji bo vê xwepeşandanên bi rihê yekitiya neteweyî dê pêk bînin.

4. Jinên Kurd li Ewropa xwe li hemberî pêşketin, qeyran û şerê li ser Kurdistanê berpirsiyar dibînin û ji bo aştiyê dê bi hevre têbikoşin û ji bo wê li Ewropa karên siyasî, civakî û dîplomatîk dê zêdetir werin kirin.

5. Jin, piştgiriyeke çalak dê bidin pevajoya nû ya ji bo çareseriya pirsgirêka Kurd li Bakurê Kurdistanê; û dê ji bo peşîgirtina hemû metirsiyên li Rojavayê Kurdistanê hewleke netewî bê dayin; ji bo parastina pêgeha heyî ya Başûrê  Kurdistanê dê bi yek dengî li ber xwe bidin; û li hemberî zor û zexta dewleta Îranê li Rojhilatê Kurdistanê têkoşînê li ser asta neteweyî bi hêztir bikin.

6. Li dijî tundiyê divê têkoşîneke hevbeş bê dayîn û mafê jinan bê parastin.

7. Li dijî hemû şîdeta dewletên dagirker li ser jinên Kurd pewîste bi têkoşîna dîplomatîk-siyasî di nav saziyên navdewletî de li Ewropa kar bên bi rêve birin.

8. Ji bo bi hêzkirina pêywendiyên di navbera jinên ji çand, bawerî û neteweyên din yên li Ewropa de danûnstandinên dostanî û hevaltiyê bên pêşxistin.

9. Divê li hemberî pirsgirêkên jinên li derveyî welat pêre rû bi rû dimînin (bişaftin-asîmîlasyon, nijadperestî), li hemberî bişaftinê helwesteke hevbeş bê nîşandan.

10. Ji bo pêşxistin û pesendkirina fermî ya çand, bawerî û zimanê Kurdî li welatên Ewropa divê kar û xebatên hevbeş bên kirin û  bang li hemû malbatên Kurd dikin ku ji bo parastina ziman û nasnameyê erka xwe bi cih bînin.

11. Divê jinên Kurd li derveyî welat (Ewropa), ji bo aboriya xweser (autonom) projeyên hevbeş pêş bixin, her wiha ji bo projeyên ji bo alikariya jinên Kurd yên li welat jî xwedî helwesteke xurt bin.

12. Divê di nava her mercan de, mafê jinan yên siyasî, aborî, civakî, bi têkoşîneke hevbeş bê parastin.

13. Di konferansê de bang hat kirin ku demeke zûtirîn konferanseke neteweyî di asta Kurdistanê de bê komkirin, yekîtiya neteweyî bê xurtkirin û jin jî wek pêşeng di nav de cih bigirin.

14. Ji bo rojevkirina mijarên hevbeş (koçberî, tundî, aborî, çand û ziman û hwd.), bi awayekî demdirêj, demokrat, semîner, komxebat bên plansazkirin.

15. Ji bo bîra jinan ya hevpar bê xurtkirin, xebatên arşîvî bên çêkirin.

16. Ji bo rizgarkirina jinên Êzidî ku heta niha wek civak rastî 72 ferman-jenosîdan hatine, platform li ser asteke neteweyî û navneteweyî bixebite.

17. Ji bo konferans, semîner û panelên ji îro pêde werin lidarxistin, dê zimanê Kurdî bi her sê zaraveyên xwe (Kurmancî, Soranî û Zazakî) cih bigire.

18. Platform, ji bo karesata lehiyê ya li Çemçemal û Kerkûkê çêbûyî ku bûye sedema malwêranî û windahiyan, sersaxiyê dixwaze û êşa malbatan parve dikem ,herwiha banga alîkariyê dike.

PUKMEDIA