Qubad Talebanî: Bêyî YNK ti hikûmetek serkeftî nayê avakirin

PUKMEDIA

Qubad Talebanî cîgirê serokwezîr

Qubad Talebanî, Cîgirê Serokwezîrê Herêma Kurdistanê piştrast kir ku Yekîtiya Nîştimanî ya  Kurdistanê amade ye ku bi partiyên din ên siyasî re ji bo avakirina Hikûmeta Herêma Kurdistanê ya nû danûstandinan ji nû ve dest pê bike.

Di civîneke çapemeniyê de ku ji hêla PUKMEDIA ve hate şopandin, Talebanî got jî: Zû ye ku mirov li ser helwestên di hikûmeta federal de gotûbêj bike. Encamên hilbijartinê hîn nehatine qedandin, û em li benda pejirandina wan in berî ku dest bi gotûbêjê li ser avakirina hikûmeta federal a nû bikin.

Wî diyar kir: Serokkomarî ji bo Kurdan hatiye veqetandin, û em li benda destpêkirina van gotûbêjan in. Îraq ji bo diyarkirina helwestên Serokwezîr, Serokkomar û Serokê Parlamentoyê hewceyê lihevkirin û hevsengiyê ye.
 Qubad Talebanî şîrove kir: Ji bo avakirina hikûmeta nû ya Herêma Kurdistanê, divê diyalog di navbera partiyên siyasî de dest pê bike, bi beşdariya hemû aliyan. Di derbarê hikûmeta federal de, nerîneke me ya baş ji bo Îraqê heye û em dixwazin hikûmetek federal bê avakirin ku xizmeta hemû gelê Îraqê bike. Îraq xwedî aboriyek bihêz e û dikare xwedî pêgeheke navneteweyî ya bihêz be, û divê hemû partiyên siyasî ji bo gihandina Îraqê bo wê pêgeha bihêz bixebitin. Hêza Îraqê bi hêza Herêma Kurdistanê ve girêdayî ye, û em di Îraqek qels de ti sûdek ji bo Herêma Kurdistanê nabînin. Divê Îraq bihêz be.

Amaje bi wê jî kir ku: Em dixwazin li Îraqê hikûmetek ava bikin ku hewl bide pirsgirêkên mayî yên di navbera herêm û Bexdayê de bi awayeke yekcarî û bingehîn çareser bike, nemaze pirsgirêkên mûçeyan û petrolê, û qanûna petrol û gazê bicîh bîne. Em di Yekîtiya Nîştimanî ya Kurdistanê (YNK) de piştgirî didin bicîhanîna vê qanûnê bi awayekî ku hevsengiyê vegerîne sektora petrolê.

Biryara dawî ya avakirina hikûmeta nû ya Herêma Kurdistanê biryara partiyan e, û gefên ku dibêjin hikûmet bêyî beşdariya Yekîtiya Niştîmanî ya Kurdistanê were avakirin bê bingeh in. Bê beşdariya YNK ti hikûmetek li Herêma Kurdistanê bi ser nakeve.

PUKMEDIA