Kerkûk: Perde ji ser peykerê Mam Celal hate rakirin

PUKMEDIA

Kerkûk

Îro Çarşemê danê êvarê, li bajarê Kerkûk merasîmeke fermî ya mezin hate lidarxistin da ku perde ji ser peykerê serokê rihmetî Celal Talebanî (Mam Celal) li Parka Derwaze, ku li ser rêya Kerkûk-Silêmanîyê ye, di nav kombûneke mezin a fermî û giştî de were vekirin.

Di nav beşdarvanan de Aso Mamend serpereştê rêxistinên Yekîtiya Niştimanî ya Kurdistanê li Kerkûk-Selaheddîn û Rêbwar Taha Parêzgarê Kerkûk, Mihemed Sabîr serokê saziya Mam Celal, Xanima Yekem Şanaz Îbrahîm Ehmed û hejmarek endamên Parlamentoya Îraqê, serkirdeyên YNK û kesayetên siyasî, çandî û civakî yên navdar hebûn.

Di merasîmê de, di gelek axaftinan de rola neteweyî û pêşeng a serokê rihmetî Celal Talebanî di damezrandina prensîbên biratî û jiyana aştiyane di navbera civakên cûda yên Îraqê de, hewldanên wî yên girîng di avakirina pêvajoya siyasî de piştî 2003an, û helwestên wî yên dîrokî di parastina mafên gelê Kurd û Îraqê de bi giştî, hat tekez kirin. Axaftvanan her wiha serbilindiya xwe ya ji bo bîranîna Mam Celal bi rêya vê peykerê anîn ziman, ku kesayetiya wî ya sembolîk û pêgeha wî di dilê gelê Kerkûk, Kurdistan û Îraqê de temsîl dike.

Peyker şeş metre bilind e û pênc meh berdewam peykersaz Saman Ebûbekir têde xebitiye, ku bi bi şêwazek hunerî rûyê Mam Celal xêz kiriye ku statuya wî wekî rêberek dîrokî yê Kurdên Îraqê nîşan dide.

Amadebûyan spasiya xwe ji bo vê destpêşxeriyê anîn ziman, ku mîrata rêberek bêhempa tîne bîra mirov ku şopa xwe li ser rêça dîroka siyasî ya Îraqê ya nûjen hiştiye.


PUKMEDIA