Washington pêşwazîya rêkeftina ji nû ve destpêkirina hinardekirina petrolê ji Herêmê dike

PUKMEDIA

Logoya wezareta derve yê Amerîkayê

Wezareta Derve ya Amerîkayê peymana petrolê ya di navbera Hikûmeta Herêma Kurdistanê, Hikûmeta Îraqê û kampaniyên petrolê de ku hatiye îmzekirin, pêşwazî kir û rê li ber ji nû ve destpêkirina hinardekirina petrolê ji herêmê vekir.

Wezareta Derve ya Amerîkayê di daxuyaniyekê de got: Em pêşwaziya ragihandina rêkeftinekê ji aliyê hikûmeta Îraqê ve bi Hikûmeta Herêma Kurdistanê û kampaniyên navneteweyî re ji bo vejandina boriya petrolê ya Îraq-Tirkiyeyê dikin.
Di daxuyaniyê de amaje bi wê jî hat kirin ku "Amerîkayê ev rêkeftin hêsan kir, ku dê di berjewendiyên Amerîkiyan û Îraqê de be.
Di daxuyaniyê de pesnê "hewldanên biryardar ên Serokwezîrê Îraqê Mihemed Şeya El-Sûdanî, û her weha hewldanên berpirsên payebilind ên Hikûmeta Îraq û Herêma Kurdistanê ji bo bidestxistina van encaman" hat dayîn.

Wezareta Derve ya Amerîkayê di daxuyaniya xwe de aşkire kir ku "ev rêkeftin dê hevkariya aborî ya avaker di navbera Dewletên Yekbûyî û Îraqê de xurt bike, handana aramkirina jîngeha  veberhênana aramtir ji bo kampaniyên Amerîkî li hemû deverên Îraqê, ewlehiya enerjiyê li navçeyê baştir bike û serweriya Îraqê xurt bike.

PUKMEDIA