Cîgirê Serok girîngiya berdewamiya hevahengiyê di navbera Pêşmerge û Hevpeymaniyê de tekez kir

PUKMEDIA

Hevdîtina cîgirê serokê Herêmê

Roja Duşemê 15ê Îlona 2025an, Cîgirê Serokê Herêma Kurdistanê brêz Ceifer Şêx Mistefa, pêşwaziya Mazin El-Feqîh, berpirsê Karûbarên Siyasî û Aborî li Konsulxaneya Amerîkayê li Herêma Kurdistanê kir.

Di hevdîtinê de, wan li ser pêşketinên dawî yên siyasî û ewlehiyê li Îraq û Herêma Kurdistanê, gef û metirsiyên ku ji hêla DAIŞê ve li ser herêmê çêdibin, têkiliyên di navbera Hewlêr û Bexdayê de, û mijara mûçe û mafên darayî yên Herêma Kurdistanê gotûbêj kirin.

Cîgirê Serok tekezî li ser rol û bandora girîng a hêzên Amerîkayê di çarçoveya hevpeymaniya navneteweyî ya li dijî DAIŞê de li herêmê kir. Wî her wiha pêwîstiya zêdekirina piştgirî û hevahengiyê di navbera Herêma Kurdistanê û hêzên Pêşmerge de bi hêzên hevpeyman re ji bo parastina ewlehî û aramiya herêmê dubare kir.
Di hevdîtinê de her wiha pêvajoya çeksazî û ji nû ve birêxistinkirina hêzên Pêşmerge hate gotûbêj kirin, her du aliyan girîngiya pêşvebirina vê pêvajoyê û lezandina qonaxên wê yên mayî tekez kirin.

Di civînê de her wiha li ser pêşketin û rewşên welatên cîran, her wiha krîz û aloziyên li Rojhilata Navîn gotûbêj hatin kirin û li ser bandora van pêşketinan li ser herêmê nerîn hatin parvekirin.


PUKMEDIA