Îsraîlê êrîşên esmanî li navend û rojavayê Sûriyê encam dan

SANA

Êrîşa esmanî li Sûriyê

Ajansa SANA ya nûçeyan ya dewleta Sûriyê şeva borî ragihand ku Îsraîlê li deverên navîn û rojavayê Sûriyê êrîşên esmanî encam da.

Ajansa Reuters ragihand ku Wezareta Derve ya Sûriyê êrîşên esmanî wekî binpêkirinek eşkere bo ser serwerî û aramiya herêmî şermezar kir.

Lê ji aliyê Hikûmeta Îsraîlê ve hîna çi daxuyanî  nehatiye dayîn, berê Wezîrê Parastinê Îsraîlê Katz gotibû:Hêz ji bo ewlehiya Îsraîlê şev û roj li hemî deverên şer kar dikin.

Piştî hilweşîna rêjîma Serokê berê Beşar Esed di heyva Kanûna Pêşîn de, ku hikûmetek bi serokatiya Îslamî ji hêla serhildêrên berê ve hat avakirin, Îsraîlê bi dehan êrîş li seranserê Sûriyê encam dane.

Îsraîlê wê demê gotibû: Ew ji bo rawestandina ketina çekan "di destên tundrewan" de tevdigere.

Ajansa Sana ya Sûriyê roja Duşemê dereng gotibû: Êrîş li nêzî bajarên Humis û Palmyra, û her weha li bajarê peravê Lazaqiyê hatine kirin.

Rewangeha Sûrî ji bo Mafên Mirovan (SOHR) ya ku navenda wê li Brîtanya ye got:Êrîşa Îsraîlê li nêzî Humisê yekîneyeke leşkerî li başûrê bajêr kiriye armanc lê derbarê qurbaniyan çi zanyarî tune ye.

Li gorî Rewangeha Sûrî ji bo Mafên Mirovan (SOHR) îsal, Artêşa Îsraîlê 97 êrîş pêk anîne  ku 86 êrîşên asmanî û 11 operasyonên bejahî bûne.

Sana di destpêka vê mehê de ragihand ku leşkerên Îsraîlî heft kes li parêzgeha Quneytre ya başûr girtine, ku Artêşa Îsraîlê wê demê gotibû: Gumanbarên çalakiyên terorîstî ne.

Di meha Tîrmehê de, Îsraîlê hêzên hikûmeta Sûriyê li dora Siweydayê ya li başûrê welêt bombebaran kir dema ku artêş piştî pevçûnên mezhebî yên kujer ket bajarê ku bi piranî Durzî lê dijîn.

Çavkanî: BBC

PUKMEDIA