Zêdetirî 70 rojan e mûçexweran mûçeyên xwe wernegirtine

PUKMEDIA

Diravê Êraqî

Her çend e ku dabeşnekirina mûçeyan li Herîma Kurdistanê 73 roj derbaz kiriye,lê, ji bo dayîna mûçeyan ji Bexdayê çi demek diyarkirî tune ye, û mûçexwer li benda biryara Dadgeha Federal in, ku biryar e sibê li ser mijara mûçexweran bicive, Endamekî firaksiyona YNKê li Civata Nûneran got: Divê Civata Nûneran li ser binpêkirina biryara Dadgeha Federal bêdeng nebe.

Dr.Biryar Reşîd, Endamê Civata Nûneran ya Êraqê ji firaksiyona YNKê, ji PUKMEDIA re ragihand ku digel wê yekê ku 73 roj in mûçexwerên Herêma Kurdistanê mûçeyên xwe wernegirtine, lê divê Civata Nûneran êdî bêdeng nemîne, û di civîna duh de jî min bi eşkereyî ji serokê Civata Nûneran xwest ku di mijara neşandina mûçeyan ji bo herêmê de helwestekê nîşan bide.

Dr. Biryar Reşîd dibêje: Ne şandina mûçeyan ji bo herêmê li dijî biryara Dadgeha Federalî ye, û pêwîste Civata Nûneran helwesta xwe hebe û wan binpêkirinan rabigire, her çend e em dizanin ku her du hikûmet xemsar in di rêkeftinên di navbera xwe de, lê çênabe mûçeyên mûçexweran têkelî siyaseta wan bê kirin û mûçe jî bên ragirtin.

Roja13ê Gulana 2025an, Wezareta Darayî ya Hikûmeta Herêma Kurdistanê lîsteya mûçeyên heyva Nîsanê belav kir û li gorî xişteyê jî di nava 4 rojan de hemû mûçexweran mûçeyên xwe wergirtin,lê, ji wê demê heya îro, 13ê Tîrmeha 2025an, mûçexwerên herêmê çi mûçeyek,wernegirtine, di demekê de ku Wezareta Darayî ya Êraqê dest bi belavkirina mûçeyên Tîrmeh yê Êraqê kiriye, lê mûçexwerên Hikûmeta Herêma Kurdistanê hîna mûçeyên heyva Gulanê wernegirtine, ev yek di demekê de ye ku dabeşkirina mûçeyên Nîsanê ji 15 rojan zêdetir dereng mabû.

Mûçexwerên Herêma Kurdistanê çavrê dikin ku sibe roja Duşemê rêkefta (14-07-2025) an, Dadgeha Federal ya Êraqê li ser giliya mûçexwerên Hikûmeta Herêma Kurdistanê biryarek derxîne, bi vî awayî dê dawiyê li rawestandina mûçeyan ji aliyê Wezareta Darayî ya Êraqê ve bîne.

Ev yek di demekê de ye ku, di civîna Civata Wezîran ya Êraqê de biryar derbarê dirustkirina komîteyekê ji şeş kesî ji bo çareserkirina vekirina projeyên pêşniyarkirî yên Hikûmetên Êraq û Herêma kurdistanê derbarê çareseriya pirsa mûçe û petrol û dahat û Tewtînê pêk anî, her çend e biryar bû komîte di nav 48 demjimêran de karên xwe bi dawî bikira jî, lê pênc roj di ser avakirina komîteyê derbas bûne û hîna jî biryar li ser çarenivîsa mûçexwerên herêmê ne daye.

Beriya niha, Wezîra Darayî ya Êraqê biryar dabû ku mûçeyan ji Herêma Kurdistanê re neşîne, ji ber ku pişkê Herêma Kurdistanê di budceya sê salên borî de,ku li parlemanê hatiye pesendkirin ji bo salên (2023-2024 û 2025) an temam bûne, aliyên Kurdistanî jî dibêjin: Ew nivîsa Darayî ya Êraqê ne destûrî ye, ev jî zêdetirî 40 roj in bûye egera karvedanên cuda cuda, û hewlên Herêma Kurdistanê jî ji bo çareseriya wê pirsgirêkê berdewam in.

PUKMEDIA