Dadgeha Federal çareserkirina pirsgirêka mûçeyan paşda dixe

Medya

Dadgeha Bilind ya Federal ya Êraqê

Dadwerên Dadgeha Federal ya Êraqê yên ku ji Erebistana Siûdiyê bûn vegeriyane Êraqê, lê dê civîna xwe ya derbarê pirsa mûçeyên mûçexwerên Herêma Kurdistanê paşda bixin, endamekî firaksiyona YNKê jî dibêje: Dadgeha Federal dê demê bide aliyan daku wê pirsgirêkê di navbera xwe de çareser bikin.

Xerîb Ehmed, Endamê Firaksiyona YNKê li Parlemana Êraqê, ji malpera fermî ya Yekîtiya Niştimanî ya Kurdistanê (PUKMEDIA) re ragihand ku, hemû dadwerên Dadgeha Federal yên ku ji bo pêkanîna ferîzeya Hecê li Erebistana Siûdiyê bûn, niha ew vegeriyane û tê çavrêkirin ku heya dawiya vê hefteyê li ser pirsa rawestandina mûçeyên mûçexwerên Herêma Kurdistanê dê bicivin.

Xerîb Ehmed got: Sedema paşdaketina civîna dadgehê li ser wê pirsê vedigere bo wê yekê ku girînge demek bi aliyan bê dayîn bi taybet (Hevpeymaniya Birêvebirina Dewletê) daku beriya biryara dadgehê hewl bidin ku li ser wê pirsê rêkeftinekê bikin.

Xerîb Ehmed got:Li gorî nêrîna Dadgeha Federal, piraniya endamên Parlemana Êraqê û wezîrên hikûmeta Êraqê, biryara Wezîra Darayî Teyf Samî ne destûrî û ne yasaya û bi xirap bi karanîna desthilatdariyê dizanin,û tekez dikin ku pêwîste ew biryar were hilweşandin.

Ev yek di demekê de ye ku, Wezareta Darayî ya Êraqê roja 28ê Gulan ya sala 2025an de hişyarî da Hikûmeta Herêma Kurdistanê ku êdî ew nikare berdewam bin li ser şandina pareyên mûçeyan,û sedemê bi wê yekê ve girêdaye ku herêmê ji beşa xwe ya yasayî ya budçeyê hatiye veqetandin derbas bûye, li hemberî wê jî fermanberên Hikûmeta Herêma Kurdistanê roja 1ê Hezîran ya sala 2025an gilînameyek li Dadgeha Federal tomar kiribûn û daxwaz kiribûn ku xerckirina mûçeyan di dema xwe ya diyarîkirî de berdewam bişînin û divê Dadgeha Federalî fermanekê derxîne ku Wezareta Darayî ya Êraqê pabend bike bi cî bi cîkirina biryara dadgehê û şandina mûçeyan.
 
PUKMEDIA