Fireksiyona Yekîtiya Niştimanî.. Xebatên berdewam ji bo dîtina zarokên winda yên Helebce

PUKMEDIA

Helebce

Fireksiyona Yekîtiya Niştimanî ya Kurdistanê li civata nûneran kar bo vegerandina zarokên winda yên bajarê Helebce dike û di vê derbarê de nameyeke fermî ji wezareta derve re şandiye.

Nûnera Yekîtiya Niştimanî ya Kurdistanê Çiro Hema Şerîf ji PUKMEDIA`yê re ragihand: Me pirsa zarokên windabûyî yên bajarê Helebce li civata nûneran anî ziman û biryar hat dayîn ku şandeke parlementoyê ligel aliyên peywendîdar serdana komara Îslamî ya Îranê bikin ji bo dîtina van zarokên wenda.

Wê her wiha got: Li ser daxwaza me civînek di navbera Dezgeha Şehîdên Federal, wezaretên navxwe û derve, wezaretên tendirustî û şehîd û enfalê yên hikûmeta Herêma Kurdistanê û konsulxaneya Îranê ji bo gotûbêjkirina dosyeya windayan hate lidarxistin.
Wê diyar kir: Li gor amarên ku di destê me de ne, 74 malbat li benda diyarkirina çarenivîsa zarokên xwe yên winda ne, ku hejmara wan 211 zarokin ku di dema bombebarankirina wî bajarî bi çekên kîmyayî di sala 1988`an de çûne Komara Îslamî ya Îranê.

Amaje bi wê yekê jî kir ku, Yekîtiya Niştimanî ya Kurdistanê her sal dema bibîranîna karesata Helebçeyê di 16ê Adarê de xizmeteke nû pêşkêşî xelkê vî bajarê şehîdan dike û îsal jî em dixwazin xizmeteke din pêşkêş bikin, ku ew jî dîtina wan zarokên winda ne.

PUKMEDIA