Iraq amade ye ku diyaloga Rûsya û Ukrayna hêsan bike

Serokomarê Iraqê û Serokê Ukraynayê

Buroya Çapemeniyê ya Serokomariyê

Li kêleka Korbenda Aborî ya Cîhanî li Davosê, Serok Abdul Letîf Cemal Reşîd bi Serokê Ukraynayê Volodymyr Zelensky re civiya. Di civînê de firsend hat dayîn ku li ser pirsgirêkên  cîhanî û herêmî gotûbêj bên kirin.

Her li vê hevdîtinê de, Serok Reşîd pabendbûna Iraqê bi rêzgirtina li serweriya niştimanî dupat kir û tekez li ser giringiya çareserkirina pirsgirêan bi rêyên aştiyane û li gor biryarên Netewên Yekgirtî kir. Li ser encamên wêranker ên şer nirxand û wiha got: “Di pevçûnan de bi rastî serkeftî nînin. Her wiha kesên serketî jî zirarên mezin ên mirovî û madî dibînin.”

Wî her wiha bang li civaka navneteweyî kir ku ji bo çareserkirina pirasgirêkên  Rûsya û Ukrayna gavên bibiryar bavêje û got: "Divê em li pey çareseriyên aştiyane bin, ji ber ku tenê aştî dikare aramiya mayînde misoger bike."

Serokomar Reşîd helwêsta bêalî ya Iraqê li hember pirasgirêkên  heyî dupat kir û amadehiya welatê xwe ji bo hêsankirina diyaloga di navbera aliyan de nîşan da.

"Iraq amade ye ku alîkariyê bike bo teşwîqkirina gotûbêjên watedar ji bo aştiyê," wî teqez kir.

Serok Zelensky spasiya xwe ji bo nêzîkatiya hevseng û avaker a Iraqê ji bo şer nîşan da. Wî her wiha xema Ukraynayê ji bo bihêzkirina peywendiyên aborî bi Iraqê re, bi taybetî di warê çandiniyê de, anî ziman. Zelensky bal kişand ser rola Ukrayna wekî hinardekarek sereke, potansiyela zêdekirina hevkariyê di peydakirina berhemên çandiniyê yên bingehîn de, di nav de genim, ceh û dexlên din, ji bo piştgirîkirina hewcedariyên Iraqê.

PUKMEDIA