Li Herêmê rûniştvan pirin û budce kême

Kurdistan 09:24 AM - 2024-11-27

Nexşeya Êraq û dînarên Êraqî

Li gorî encamên destpêkê yên serjimêriya herî dawî ya ku di rojên 20 û 21ê Mijdara 2024an de li Êraqê hatiye encamdan, hejmara rûniştvanên Herêma Kurdistanê 14.03% ji nifusa Êraqê derket, Parlamenterekî parlamentoya Êraqê ragihand: Hikûmeta Êraqê ti carî bûdceya temam yê Herêma Kurdistanê neşandiye.

Li gorî encamên destpêkê yên serjimêriyê hejmara niştecihên Êraqê 45 milyon û 407 hezar û 895 kes e, hejmara rûniştvanên Herêma Kurdistanê jî 6 milyon û 370 hezar û 668 kes e.

Li gorî analîza PUKMEDÎA’yê li ser tevaya nifûsa Êraqê, rêjeya nifûsa Herêma Kurdistanê %14.03’ê nifûsa Êraqê ye.

Kerwan Yarwês: Êraq mafên temam yê Herêmê di budceyê de ne daye

 

Parlamenterê Fraksiyona YNKê li Parlamentoya Êraqê Kerwan Yarwês ji PUKMEDIA re ragihand: Ji sala 2005ê ve heta niha hikûmeta Êraqê ti carî hemû mafên xelkê Herêma Kurdistanê di bûdceyê de nedaye, lewma pêşbînî nayê kirin li gorî vê serjimêriya ku niştecih zêde bûye, bûdce zêde bike.

Li gorî qanûna bûdceya Êraqê ya sala 2023, 2024 û 2025ê ku li parlemanê deng li ser hatiye dayîn bûdceya Herêma Kurdistanê ji sedî 12.67 e, ji ber wê nayê çavrêkirin ku disala bê de jî budcea Herêmê were guhartin.

Bûdçeya îsal jî dê wek salên berê be

 

Hejmara rûniştvanên Herêma Kurdistanê 6 milyon û 370 hezar û 668 kese bi ser parêzgehên Hewlêr, Silêmanî, Duhok û rêveberiyên xweser hatine dabeşkirin ku ji wan 3 milyon û 200 hezar û 506 mêr û 3 milyon û 170 hezar û 162 jî jin in.

Kerwan Yarwês got: Zêdebûna nifûsa herêmê dê bandorê li bûdceya geşepêdana parêzgehan bike, herweha li gel ku Encumena Wezîran a Êraqê çend madeyên qanûna bûdceyê sererast kirin û ji parlamentoyê re şandin, lê belê ti pêwendiya yek ji madeyên ku hatine guhertin bi mûçe û bûdceya herêmê ve nîne.

Li gorî şopandina malpera PUKMEDIA, pişka Herêma Kurdistanê ji bûdceya niha 12.67 % û salane pişka wê 20 trîlyon dînare, lê eger rêjeya niha ya %14.3 were pejirandin, dibe ku ev rêje zêdetir bibe ji 22 trîlyon dînar.

Serjimêriya giştî ya xelkê 3 rojan li seranserê Êraq û Herêma Kurdistanê hat kirin. Pêvajoya serjimêriya giştî ya nifûsê sibeha roja Çarşemê, 20ê Mijdara 2024, dest pê kir, û heya şeva înê, 22ê Mijdara 2024, berdewam kir, serjimarvan serdana her malekê kirin û dane temam kirin.

PUKMEDIA