Şêx Cafer: Divê kabîneya nû li ser esasê berjewendiyên welat bê avakirin

Cîgirê Serokê Herêma Kurdistanê

Cîgirê Serok û Konsulê Giştî yê Almanyayê

Cîgirê Serokê Herêma Kurdistanê Şêx Cefer Şêx Mistefa pêşwaziya Konsulê Giştî yê Almanyayê li Herêma Kurdistanê Albrecht von Wittke û Kolonel Ritter Fermandeyê Leşkerî yê Hêzên Hevpeymaniya Almanya û şandeke pê re kir. Di hevdîtinê de pêşhatên siyasî û emnî yên Iraq û navçeyê, peywendiyên Almanya li gel Iraq û Herêma Kurdistanê, encamên hilbijartinên parlamentoya Kurdistanê û pêkanîna kabîneya nû û pirsgirêkên daliqandî  yên navbera Hewlêr û Bexdayê û çawaniya çareserkirina wan gotûbêj kirin.

Di hevdîtinê de Cîgirê Serokê Herêma Kurdistanê rola hêzên Almanya di hevpeymaniya navdewletî ya li dijî DAIŞê de û alîkariya wan bo Iraq û Herêma Kurdistanê bilind nirxand. Her wiha balkişand li ser hilbijartinên parlamentoya Kurdistanê û encamdan û pêkanîna hikûmeta nû ya Herêma Kurdistanê û hêvî xwest ku di demek nêzîk de li ser esasê berjewendiyên welat û dabînkirina refaha xelkê, kabîneya nû ya hikûmetê were pêkanîn.

Ji aliyê xwe ve şanda mêvan tekezî li ser berdewamî û pêşkeftina peywendiyên welatê xwe li gel Herêma Kurdistanê û Iraqê kir.Di hevdîtinê de rola Serokatiya Herêma Kurdistanê di destpêşxeriya çareserkirina pirsgirêkan de bilind nirxand û diyaloga di navbera aliyên siyasî yên Iraq û navçeyê de ji bo derbaskirina pirsgirêkên li pêşiya proseya siyasî û rêkeftinên navbera Hewlêr û Bexdayê girîng dîtin.

PUKMEDIA