Serok Bafil: Pêwîstiya herêma me bi guhertinek di proseya rêveberiyê de heye

Daxuyaniya Serok Bafil

Serok Bafil û Balyozê Amerîkî

Serokê Yekîtiya Niştimanî ya Kurdistanê (YNK) Bafil Celal Talebanî li baregeha mekteba siyasî ya Hewlêrê pêşwaziya Alina Romanowski Balyoza Amerîka li Iraqê kir.Di civînekê de ku, Berpirsê Buroya Pêwendiyan Derbaz Kosret Resûl jî amade bû, rewşa giştî ya Herêma Kurdistanê hat gotûbêjkirin û gavên ji bo lidarxistina hilbijartinên dadmend hatin gotûbêjkirin.

Serok Bafil Celal Talebanî rewşa Herêma Kurdistanê şîrove kir u got:’’ Ber bi hilbijartineke girîng û diyarker ve diçin,pêwîstiya Herêma Kurdistanê bi guhertinan di proseya hikûmraniyê de heye û divê rewatiya saziyên yasayî were vegerandin. Em hêvîdar in ku her kes ji bo serxistina pêvajoyê û lidarxistina hilbijartinên adil ku bibe sedema aramî û bihêzkirina herêma me bibe alîkar.’’

Di derbarê rewşa Herêma Kurdistanê û jiyana xelkê de jî Serok Bafil got:’’ Em hertim alîgirê diyalog û têgihiştina hevbeş li gel hemû hêz û aliyên siyasî bûne, armanca me bidestveanîna jiyaneke dadperwer û pêşerojeke aram e. Em daxwaz ji hikûmetê dikin ku xizmeta welatiyan bike û di pêşkêşkirina xizmetguzariyan de cudahiyê neke.Mixabin her wekî berê me dît, jiyana xelkê bi nakokiyên siyasî û hizbî ve tevlîhev bû û hikûmet xistine  xizmeta berjewendiyên hizbî.’’

Pirsa Pêşmerge û yekxistina hêzan mijareke dinê civînê bû. Di vê derbarê de Serok Bafil got, helwesta me eşkere ye û em dûbare dikin; Em dixwazin hêzeke niştimanî ya bihêz û bê destwerdanên hizbî ava bikin ji bo vê yeke hewlê me berdewam in . Em naxwazin ti astengî li pêşiya vê proseya niştimanî çêbibin û alîkariya hevpeymanan di vî warî de bilind dinirxînin.

PUKMEDIA