Lîsteya mûçeyên meha Hezîranê pêşkêşî Bexdayê hat kirin

Kurdistan 02:55 PM - 2024-06-29

Dînarê Iraqî

Hikûmeta Herêma Kurdistanê lîsteya mûçeyên meha Hezîranê radestî Bexdayê kir û piştî pişkinînê, biryare ew pereyê ku ji bo mûçeyên Herêma Kurdistanê hatiye terxankirin, ji bo herêmê were şandin, lê ne diyar e çend roj dê ev pişkinîn bidome.

Di lîsteyê de navên hemû karmendên mûçe hene

Wezareta Darayî û Aborî ya Hikûmeta Herêma Kurdistanê di daxuyaniyekê de ragihand;“Îro danê sibê şemî 29.06.2024, lîsteya mûçeyê meha Hezîranê ya hemû karmend, xanenişîn û mûçeyên sivîl û leşkeran ji aliyê tîma Wezareta Darayî ya Hikûmeta Herêma Kurdistanê ve radestî Rêveberiya Giştî ya Hesabgiriyê ya Wezareta Darayî ya Federal hat kirin.’’

Ne diyar e Bexda dê kengê mûçeyan bişîne

Li gorî malpera fermî ya Yekîtiya Niştimanî ya Kurdistanê (PUKMEDIA), Hikûmeta Herêma Kurdistanê roja 21.04.2024ê lîsteya mûçeyan radestî Bexdayê kiriye, lê piştî nêzîkî 25 rojan, roja 14.05.2024ê, Bexdayê mûçe şandine.

Her wiha ji bo meha Gulanê jî di 4ê Hezîrana 2024ê de lîsteya mûçe ji Bexdayê re hatiye şandin, di 06.06.2024ê de jî mûçe ji Bexdayê hatiye şandin.

Wezareta Darayî ya Iraqê li ser lîsteya mûçeyên meha Hezîranê yên Hikûmeta Herêma Kurdistanê pişkinîn dike û ne diyar e ka dê kengê mûçe ji herêmê re were şandin.

Li herêmê zêdetirî milyonek karker mûçeyê wan hene

Li gorî PUKMEDIA’yê, li herêmê hejmara mûçeyên karmendan li gorî sîstema biyometrîk (1 milyon û 249 hezar û 481) ye.

 

Nêzîkî 21 trîlyon dînar para herêmê ye û zêdetirî 11 trîlyon dînar jî bo mûçe ye

Nêzîkî 21 trîlyon dînar para herêmê ye û zêdetirî 11 trîlyon dînar jî bo mûçe ye.Parlamentoya Iraqê di 3-6-2024an de bernameya bûdceyê sererast kir.Di sala 2024an de, zêdetir ji 20 trîlyon û 910 milyar dînar wek pişka herêmê hatiye terxankirin, ku zêdetirî 11 trîlyon dînar ji bo mûçeyên herêmê hatiye terxankirin.

PUKMEDIA