Wezîra Koç û Koçberan: Hîn jî karmendên me nikarin derbasî kampên koçberên Herêma Kurdistanê bin

Kurdistan 10:39 AM - 2024-06-23

Kampa Koçberan,

Wezîrê Koç û Koçberan Îvan Fayq tekez kir ku girtina kampên awareyan li Herêma Kurdistanê di heyama ku ji aliyê hikûmeta federal ve hatiye pesendkirin, hîn jî weke pirsgirêkeke berdewam e.

Îvan Fayq di daxuyaniyeke rojnamevanî de ragihand: Em kar dikin ku kampên koçberên Herêma Kurdistanê di dema ku ji aliyê hikûmetê ve hatiye pesendkirin de bên girtin û heta niha jî em rûbirûyê kêşeya nehiştina derbasbûna karmendên wezaretê di nav kampan de  dibin, ku astengeke heyî ye, ji ber ku mekanîzmaya xebatê bi dagirtina forma vegerê dest pê dike, da ku kesê koçber veqetîne ku wê li devera xwe yê berê bijî yan li dereke din.

Wê her wiha got: “Em bi rêya serokwezîr hewl didin hevahengiyê li gel berpirsên pêwendîdar ên herêmê bikin ji bo bidawîkirina vê dosyayê.” û da zanîn ku, li parêzgeha Silêmaniyê hevkariyeke mezin ji aliyê hikûmeta xwecihî ve heye û heta dawiya vê mehê kampên koçberan ên li gund û bajarên Silêmaniyê dê bên girtin.

Divê hemû kamp bên girtin

 

Rêveberê şaxa Parêzgehên Herêma Kurdistanê li Wezareta Koç û Koçberan Semêr Meşkûr Bidêwî ji PUKMEDIA re ragihand: Wezareta Koç û Koçberan bi biryar e ku bi yekcarî dawî li pirsgirêka koçberan bîne, hemû kampan bigire û koçberan vegerîne ser warên xwe.

Got jî: roja dawî ya girtina kampên awareyan 30/7/2024 e, û em kar bo girtina hemû kampan dikin, û kar bi başî dimeşe û gelek malbatên aware li Silêmanîyê hene ku vedigerin.

Li Silêmaniyê hevkarî ji herêmên din baştir e

 

Semêr Meşkûr Bidêwî dibêje: Hevkariya parêzgeha Silêmaniyê bi Wezareta Koç û Koçberan re gelek başe Berî heftiyekê me kampek li Silêmaniyê girtiye û bi îzna Xwedê em kar dikin ku di demeke nêzîk de kampên din bên girtin.

Got jî: Rêveberiya Parêzgariya Silêmaniyê ji bo vegera awareyan asankariyan pêşkêş dike, li parêzgehên Duhok û Hewlêrê, çûnûhatina tîmên Wezareta Koç û Koçberan hatiye astengkirin, ji ber ku rêveberiyên kampê di bin kontrola Desthilatdariya Wezareta Navxwe ya Hikûmeta Herêma Kurdistanê de ye, û tîmên wezaretê gelek hêdî li wir diçin û astengî li pêşiya vê proseyê hene.

PUKMEDIA