Piraniya partiyan û hevpeymanan ji bo hilbijartinan namzed diyar nekirine

PUKMEDIA

Parlamentoya Kurdistanê

Heta niha tenê 36 namzedên serbixwe navên xwe ji bo hilbijartinên parlamentoya Kurdistanê pêşkêş kirine û tenê du roj maye ji bo tomarkirinê, ev jî di demekê de ye ku komîsyon kar dike û amadekariya pêkanînê dike û ragihand:“Boykota ti aliyekî bandorê li derengxistina pêvajoyê nake.’’

Tenê 2 partî û 3 hevpeymanan namzet nîşan dane

Serokê Komisyona Bilind a Serbixwe ya Hilbijartinan a Iraqê Emad Cemîl ji malpera fermî ya Yekîtiya Niştimanî ya Kurdistanê (YNK) PUKMEDIA re ragihand: “Heta niha tenê 36 namzedên serbixwe navên xwe ji bo beşdariya di hilbijartinên parlamentoya Kurdistanê de pêşkêş kirine û roja pêncşemê 28-3-2024`an bo wergirtina navên berbijêran axir roje û nahê dirêj kirin.’’

“Li gorî amarên ku heta niha hene, li Hewlêrê 11, li Silêmaniyê 13 û li Duhokê jî 12 namzedan xwe  tomar kirine, li Duhok û Silêmaniyê tenê du partiyan namzedên xwe pêşkêş kirine, li Silêmanî, Duhok û Helebce jî 3 partiyan namzedên xwe pêşkêş kirine.’’ Îmad Cemîl got.

Serokê tîma medyayî ya komîsyonê got jî:“Ti pilanek ji bo paşxistina hilbijartinên parlamentoya Kurdistanê nîne û her aliyek ku proseyê baykot bike, bandorê li proseyê nake, ji ber ku di hilbijartinên encumenên parêzgehên Iraqê de jî hebûn ku hilbijartin baykot kirin û ti bandorek li ser proseyê nebû.’’
 “Ekîbên komîsyonê xebatên xwe didomînin û amadekariya hilbijartinên 10’ê Hezîrana îsal dikin.’’Got

20 partî, 2 tifaq û 62 namzetên serbixwe dê beşdar bibin

Bi giştî 20 partî, du hevpeymanî û 62 berbijarên serbixwe ji bo beşdarbûna hilbijartinên parlamentoya Kurdistanê navê xwe tomar kirine.Li Herêma Kurdistanê 3 milyon û 789 hezar û 360 dengder hene ku ji wan zêdetirî 2 milyon û 900 hezar dengder li tomara biyometrîk tomar kirine û amadene beşdarî hilbijartinan bibin.

Yekîtiya Niştimanî ya Kurdistanê (YNK) yek ji wan 22 partî û hevpeymanan e ku dê bi lîsteyên serbixwe li her çar navçeyên Kurdistanê beşdarî hilbijartinên bê yên parlamentoyê bibe. Li gor berpirsê mekteba dengan a YNKê Rizgar Hacî Hema got:’’Ji bo beşdarbûna hilbijartinan hemû amadekarî hatine kirin û YNK jî amade ye beşdarî hilbijartinan bibe.’’

PUKMEDIA