Talebanî û Mark Straw: Divê azadiya çapemeniyê li Herêma Kurdistanê kêm nebe

Ofîsa Ragihandinê ya Qubad Talebanî

Qubad Talebanî û Mark Straw

Cîgirê Serokwezîr Qubad Talebanî pêşwaziya Konsulê Giştî yê nû yê Amerîkayê li Herêma Kurdistanê Mark Straw kir û di wê hevdîtinê de çendîn mijarên balkêş  ji bo her du aliyan hatin gotûbêjkirin.
Di civîna  ku roja 23-8-2023 li bajarê Hewlêrê bi amadebûna Cîgirê Berpirsê Fermangeha Peywendiyên Derve Daban Şadala hat lidarxistin, Qubad Talebanî pîrozbahî li Mark Straw kir ji ber destbikarbûna wî weke Konsulê nû yê Amerîkayê li Herêma Kurdistanê û hêvî xwest ku pêwendiyên di navbera Herêma Kurdistanê û Amerîka di heyama karkirina wî de zêdetir pêşde biçin.
Di civînê de rewşa azadiya derbirrînê û rojnamevaniyê li Herêma Kurdistanê û Iraqê hate gotûbêjkirin û her du alî hevdeng bûn ku, herêm di warê azadiya derbirrîn û rojnamevaniyê de paşve neçe, belku pêwendiyekî  saxlemtir û pîşeyî di navbera desthilatên siyasî û medyayê de hebe. 
Li beşekî dinê vê hevdîtinê de rewşa çalakvan û rêxistinên civaka sivîl hate gotûbêjkirin û tekez li ser pêwîstiya zêdetir alîkariya rêxistinên civaka sivîl li hemû bajar û bajarokên herêmê hate kirin.
Di mijareke din de behsa çaksaziyên Wezareta Pêşmerge hat kirin û di vê derbarê de Qubad Talebanî tekez li ser berdewamiya proseya çaksaziyê û dûrxistina wezaretê ji nakokiyên siyasî kir.
PUKMEDIA