Serok Bafil: Ji bo qerebûkirina Êzdiyan ti gavên pratîk nehatine avêtin

PUKMEDIA

Jînosayd

Serokê Yekîtiya Niştimanî ya Kurdistanê Bafil Celal Talebanî bi boneya salvegera Jînosayda Êzdiyan peyamek belav kir û ragihand “Ji bo qerebûkirina xwişk û birayên Êzidî tu gavên pratîk nehatine avêtin, lê Êzidî bûne qurbaniyên nekokiyên siyasî û Şengal ku welatê wane weke wêraniyeke piştî şer maye.

Ev naveroka peyamê ye:

Îro 9 sal bi ser jînosayda xwişk û birayên Êzdî re derbas dibe lê heta niha xwîn ji vê birînê diherike. Heya niha ji bo qerebûkirina wan xwişk û birayan ti gavên pratîk nehatine avêtin, lê ew dibin qurbaniyên nekokiyên siyasî û Şingala wan ku welatê wane piştî şer wêrankirî maye. Nabe dilsoziya bi Êzdiyan re tenê di dirûşme de bimîne û divê em hemû gavan bavêjin, gavên ku bi ruhekî niştimanî û mirovî be ku bibe beşek ji vegera hêviyê bo xwişk û birayên me, ne ku birînên wan kûrtir bike.
Berpirsiyariya me hemûyan e ku em vê tawana mezin ji bîr nekin û kar bo naskirina wê wek Jînosayd bikin, herweha em helwesta wan welatên ku bi fermî ew tawan wek Jînosayd pejirandine û dane naskirin ji bîr nakin. Herweha em bang li Hikûmeta Êraqê dikin ku erkên xwe yên yasayî û mirovî yên li hember Êzidiyan bi cih bîne û ji bo qerebûkirina Êzidiyan û avakirina Şengalê êdî paşguh neke.
Silav li giyanê şehîd û qurbaniyên vê tawana ne jibîrkirî û serxweşiyê li xwişk û birayên me yên Êzdî yên berxwedêr.

Bafil Celal Talabanî
Serokê Yekîtiya Niştimanî ya Kurdistanê

Pukmedia