Stran Ebdullah: Kes nikare xwe bike marcayê kurdayetiyê li ser YNKê

Kurdistan 06:36 PM - 2023-06-13

Stran Ebdullah

Endamekî Mekteba Siyasî ya Yekîtiya Niştimanî ya Kurdistanê (YNK) dibêje:“Ti kes nikare xwe bike marcayê YNK’ê, YNK bi xwe marcayê kurdayetiyê ye.

Yasaya taybet bi parêzgehan li ser tevahiya Herêma Kurdistanê derbas dibe

Endamê Mekteba Siyasî û Berpirsê Ragihandina  Yekîtiya Niştimanî ya Kurdistanê (YNK) Stran Ebdullah di hevpeyvîneke taybet de ragihand:“Qanûna taybet bi parêzgehan di proje yasaya bûdceya Êraqê de mijareke giringe bo hemû parêzgehên Herêma Kurdistanê bê cudahî û yasa jî ji  bo her parêzgehekê ye.
"Eger mafên parezgehek  bên binpêkirin, dikare rexne li bûdceya Herêma Kurdistanê bike û rasterast bi hikûmeta Êraqê re rûbirû bimîne. Beşek din ya yasayê giringîdana mûçeyan e, di dema borî de giringî bi deynên kompanya û saziyên hikûmetê dihat dayîn, lewma bi giştî  ev car di berjewendiya gelê Kurd li parêzgehan." Stran Abdullah dibêje.

Berê  jiyana xelkê Silêmaniyê ji bo amûrên siyasî dihat bikaranîn

Her wiha got:“Beriya niha bûdceya parêzgeha Silêmaniyê rastî dorpêçeke aborî hatibû û jiyana xelkê Silêmaniyê ji bo amûrên siyasî dihat bikaranîn û niha hinek kes di wê baweriyê de ne ku ev yasa behsa Silêmaniyê dike, lê xelkê Silêmaniyê jî hêja ye ku mafên xwe werbigirin. "
"Eşkere ye ku kesên li dijî vê yasayê ne, niyeta wan xirab e ku van tiştan bi rêk û pêk bi rêve bibin, lê eger hikûmet karê xwe baş bike, ti pirsgirêk dernakeve, lê eger hikûmet bi erkê xwe ranebe, Silêmanî dikare van giliyan bigihîne Bexdayê  ku Hikûmeta Êraqê dê berpirsyariyê bigire ser milê xwe û erkê xwe bi cih bîne.” endamê Buroya Siyasî got.

Stran Ebdullah: YNK marcayê daxwazên gelê Kurd e

Tiştê ku hatiye kirin, ti pêwendiya xwe bi kurdayetiyê re nîne, lê ew mafek e ku bi destûrê ji parêzgehan re hatiye dayîn û her kesê ku bixwaze kurdiyeke rasteqîn be, divê tiştekî bike ku xelk hewceyî Bexdayê nebin. Ti kes nikare xwe bike marcayê YNKê, YNK bi xwe marcayê kurdayetiyê ye, YNK bi xwe marcayê daxwazên gelê kurd e. Kurdayetiya resen xizmetkirina gelê kurd û xêrxwaziya gelê xwe ye, kurdayetî bi zorê nayê kirin, lewma kes nikare li ser  YNKê mezadê bide.”
PUKMEDIA