Beşdar Hesen: Li Hewlêr û Duhokê mafên girtiyan tê binpêkirin

PUKMEDIA

Serokê tîma parêzerên girtiyan li Badînan, Beşdar Hesen

Serokê tîma parêzerên mehkûmên li Badînan wiha got:Cudahiyeke mezin di navbera mafên girtiyan li Silêmanî gel yê  Hewlêr û Duhokê de heye û divê mafên girtiyan li Hewlêr û Duhokê wek girtiyên Silêmaniyê bê parastin.
Serokê tîma parêzerên girtiyan li Badînan, Beşdar Hesen ji malpera fermî ya Yekîtiya Niştimanî ya Kurdistanê (YNK) PUKMEDIA re ragihand: “Cawaziyeke mezin di navbera mafên girtiyan li Silêmanî gel yê Hewlêr û Duhokê de heye û mafên girtiyan li Silêmaniyê zêdetir tê parastin’’.
“Li Silêmaniyê parêzer dikarin hefteyê 5 rojan bi girtiyan re hevdîtinê bikin, lê li Hewlêrê mafê parêzeran tenê rojekê heye ku girtiyan bibînin,lê girtiyên li Silêmaniyê beşdarî kursan dibin û dibêjin ku ew ji rêveberê girtîgeha xwe pir memnûn in,berovajî vê yekê li Hewlêrê girtî ji rêveberê saziya xwe ya çaksaziyê ditirsin û ji kursan bê par in.”wiha got.
Serokê tîma parêzerên girtiyên li Badînan wiha got:“Girtiyên Hewlêr û Duhokê ji gelek mafên din bêpar in û cezayên taybet li wan tê birîn, wek mînak dema girtiyek di zindana Silêmaniyê de dibe sedema pirsgirêkê, du sê roj tê cezakirin, lê li zindana Hewlêrê,dema ku girtî bibe sedema pirsgirêkê, 15 roj heta mehekê tê cezakirin, ev neheqiya ku li Hewlêr û Duhokê li girtiyan tê kirin."
Beşdar Hesen bi rêya PUKMEDIA daxwaz ji rêxistinên mafên mirovan kir ku parastina mafên girtiyan li Hewlêr û Duhokê bikin û rê nedin mafên wan bên binpêkirin.
PUKMEDIA