Konsulxaneya Amerîka: Tîma parastina girtiyên Badînan rastî metirsiyên mezin hatin

Ajansan

Beşdar Hesen serokê tîma parastina girtiyên Badînan

Konsulxaneya Dewletên Yekbûyî yên Amerîkayê li Hewlêrê peyameke pîrozbayî arasteyî tîma parastina girtiyên Badînan kir û tekez kir ku endamên tîmê bi awayekî serkeftî erkên xwe bi cih anîn.

Konsulxaneya Amerîka li Hewlêrê di peyama pîrozbahiyê de ragihand: Tîma parastina girtiyên Badînan bi baştirîn şêwe erkên xwe ji bo parastina miwekilên xwe bi cih anîn û endamên tîmê jî hewla bihêzkirina serweriya qanûnê dan.
Konsulxaneyê di nameya xwe de zêde kir: Endamên tîma parastina girtiyên Badînan rastî metirsiyên mezin hatin, ji wan tirsandin, dijminatî û gefên kuştinê ji aliyê kesên nenas ve.
Konsulxaneyê got: Armanca me li Êraq û Herêma Kurdistanê ew e ku em alîkariya hevkarên me yên Êraqî bikin ku mafên mirovan biparêzin, di nav de dadkirina dadmendiyê. Herweha pîrozbahî li Beşdar Hesen, Rêvînk Yasîn, Remezan Artîşî, Kamran Taha, Şoreş Kerîm, Rêbaz Wisû, Karzan Reşîd û Ferîdûn Fadil endamên tîma parastina girtiyên Badînan kir.
Hêjayî gotinê ye ku, Beşdar Hesen, serokê tîma parastina girtiyên Badînan û Şîladizî, xelata parêzvanên mafên mirovan li seranserê cîhanê, di nav de 10 kesayetiyên din ji welatên cuda, li avahiya Wezareta Derve ya Amerîkayê wergirt.

PUKMEDIA