YNK aştî û xizmetguzariyê dixwaze

Kurdistan 11:35 AM - 2023-02-03

Logoya Yekîtiya Niştimanî ya Kurdistanê

YNK li ser rêya Serok Mam Celal xebata xwe ya siyasî berdewam dike û aştî û aramî ji bo gelê Herêma Kurdistanê û Êraqê aniye.Endamekî Serkirdayetiya  YNKê dibêje:“Serok Bafil dixwaze daxwazên welatiyan di çarçoveya destûrê de bên cîbicîkirin.
Serokê Yekîtiya Niştimanî ya Kurdistanê (YNK) Bafil Celal Talebanî di heyama du rojên borî de li Bexdayê ligel hejmarek ji serkirde û balyozan civiya û di civînê de tekezî li ser wê yekê kir ku li gorî destûrê divê nakokiyên navbera Hewlêr û Bexdayê bi dawî bên.

Aştî zêdetir dê ji Bexdayê pêk were

Endama Serkirdatiya YNKê Hasîbe Ebdullah ji PUKMEDIA re wiha got:  “Karê Serok Bafil hemû bername û gavên wî bi awayekî zelal nîşan dide ew weke Serok Mam Celal e û berdewamiya peywendiyên ku Mam Celal li Bexdayê li gel Şîe, Sunne, Tirkmen û aliyên siyasî yên Êraqê ava kiribû, berdewam dike, ku armanca wê avakirina baweriyê di navbera aliyan de bo berjewendiya gelê Êraqê ye."
“Serok Bafil Talebanî Bexda xistiye karê xwe yê pêşîn, ji ber ku YNK di wê baweriyê de ye ku her çi qas peywendiyên me li gel Bexdayê baştir bibin, em dikarin zêdetir xizmeta gelê Herêma Kurdistanê bi giştî û xelkê navçeyên dervayî Heremê bikin, ji ber wê jî hewlên Serokê YNKê di serî de ji bo dabînkirina ewlehî û aştiyê ye.”’Hasîbe Ebdullah wiha got
Her wiha got: “Serokê YNKê pê hesiyaye ku cudabûna peywendiyên Herêma Kurdistanê û Bexdayê di warê aştî, ewlehî û xweşiyê de dê ziyanê bigihîne Herêma Kurdistanê.
Endamê Serkirdayetiya YNKê got: “Serok Bafil dixwaze daxwazên welatiyan di çarçoveya destûra bingehîn a Êraqê de cîbicî bike û jiyaneke minasib ji bo xelkê dabîn bike, ev hewldan ne tenê bi kêrî Kurdan tê, belku di berjewendiya hemû gelên Êraqê de ye.

YNK siyasetê dixe xizmeta gel

Yekîtiya Niştimanî ya Kurdistanê (YNK) li ser çareserkirina pirsgirêkên navbera Hewlêr û Bexdayê de israr dike û dixwaze siyasetê bike xizmeta gel,ji bo vê yekê jî hevdîtinên Serok Bafil ligel şandên pilebilind ên hikûmet û partiyên Êraqê berdewam in.
Parlamenterê Fraksiyona YNKê li Parlamentoya Êraqê Çiro Hema Şerîf ji malpera fermî ya Yekîtiya Niştimanî ya Kurdistanê PUKMEDIA re ragihand:"Serok Bafil hewl dide navbeynkariyê di navbera Hikûmeta Herêma Kurdistanê û Hikûmeta Êraqê de bike da ku pirsgirêkên xwe li gorî destûrê çareser bikin û dixwaze siyasetê dîsa bixe xizmeta gel."
Ragihand:’’Ne tenê li Herêma Kurdistanê belku li Êraqê jî, Serokê YNKê hewl dide aliyan nêzîkî hev bike, da ku xizmeta xelkê bike û zêdetir aştî li Herêma Kurdistanê û Êraqê pêk bê.”
Dema hikûmeta nû ya Êraqê hat avakirin, Yekîtiya Niştimanî ya Kurdistanê (YNK) reşnivîsek pêşkêş kir û niha hinek xalên wê reşnivîsê ketine warê cîbicîkirinê de, Serokê  YNKê hewlên xwe ji bo cîbicîkirina beşên din ên projeyê zêde kiriye, bi taybetî çareserkirina pirsgirêkên navbera Hewlêr û Bexdayê û aramî û bexteweriya zêdetir ji bo Herêma Kurdistanê û Êraqê.
PUKMEDIA