Hilbijartina Serok Bafil û serdemek nû ji bo Cîhana Erebî

Bîşe Cewher

Nivîskar: Bîşe Cewher

Hilbijartina Bafil Celal Talebanî wekî Serokê Hevpeymaniya Sosyal Demokrat li cîhana Erebî ne tenê sernavek e,ku di konfirans û merasîmekê de ew post bi kesayetiyek e Kurd bê dayîn, belkî kêliyek dîrokî ye ji bo nûnerayetiya siyasî ya Kurd û bihayên ku xebat ji bo wê kiriye, hebûna serkirdeyekî wek Bafil Celal Talebanî di nav hevpeymaniyek e de gelekî girîng e ji bo navçeyê û Rojhilata Navîn.

Niha rewa û girîng e bipirsin ji bo çi berpirsiyartiya serok girîng e? Bersiv eşkere ye û wiha dikare were bersivandin:

Gelek caran dîktatorî bûye şêweyekî hevpar yê siyasetê li herêmê, û baskên xwe li ser hukumdariyê vekiriye,  lê hebûna Bafil Talebanî wekî serkirdeyekî demokratxwaz û kurê rêberekî mezin wek Serok Mam Celal ku hîn formên gelemperî jî li navçeyê hene, ji ber vê yekê, hilbijartina serkirdeyekî Kurd yê pêşkeftîxwaz û diplomat û xwedî dîdgeh ji bo serokatiya Hevpeymaniyeke Erebî gelekî girîng e; û gelek giraniya wê heye,di heman demê de, rol û pêgeha nû ya Serok Bafil berdewamiya rêbaza bavê wî; Serok Mam Celal e, ku zêdetirî nîv sedsalekê nûnertiya Kurd û tevgera wan ya siyasî kiriye.

Serok Mam Celal, wekî yekem serokê Kurd yê Îraqê û rêberê damezrandina Şoreşa Yekîtiya Niştimanî ya Kurdistanê (YNK),her timî hewl dabû ji bo biserxistina diyalog,demokrasî, jiyana hevbeş û veguhastina xebata Kurd ji sînorên girtî yên Kurdistanê û platformên navdewletî.

Dîrok şahid e ku navê Serok Mam Celal û ramana wî ya diyalog û dûr ji tundûtûjiyê her tim di heman pîvanê de bûye,wî bawer dikir ku Îraq û navçe tenê bi riya diyalog û rêzgirtina ji bo pêkhateyan û jiyana hevbeş dikarin bibin sedema pêşketin û aramiyê, niha jî Bafil Celal Talebanî heman siyaseta bavê xwe peyrew dike, û dirêjpêderê rêbaza  wî ye, ev riya Kak Bafil  girtiye ber, ne hêsan e û em nizanin jî ka nifşê pêşerojê yê serkirdayetiya Kurd dikare van ramanan bike rastiyek û li hemberî astengiyan bi serkevin yan na, lê em piştrast in ku Serokê YNKê di vê qonaxa girîng de dê biserkeve.

Di dema niha de Cîhana Erebî rû bi rûyê gelek pirsgirêkan bûye; ji pevçûnên çekdarî bigire heya zêdebûna Milîsan, kûrbûna ne yeksanî û hevrikiyên aborî û siyasî, ev hemû û bi sed û hezaran pirsgirêk û nakokiyên din li navçeyê belav bûne; û çi demek wek niha  pêwîstî bi hebûna serkirdayetiyek e yekgirtî û yek dengî nebûye, di siya vê rewşê de, hebûna vê hevpeymaniyê li navçeyê dê girîng û hêvîbexş be daku diyalog û gotûbêj li ser pirsên aloz yên navçeyê bên kirin.

Raste çêdibe ku di hemû hevrikiyan de dengê Sosyal Demokrat bilind nebe; lê pêwîst e ew hilgirê peyama hevbeş ya rast û dirust be ku ew jî ev in:

Gelên navçeyê hewla wekhevî, dadperwerî û rêveberiyek e rast û dirust didin, helbet hilbijartina Serok Bafil nîşana wê yekê ye ku serkirdayetiya Kurd,bi taybetî jî YNKê, ji bo van bihayan hewl daye û kes nikare mîna wî ji bo wan xebatê bike,ji bilî wê jî hilbijartina vî serkirdeyê Kurd ji bo hevpeymaniyek wisa li cîhana Erebî wê peyamê hildigire ku welatên Erebî Kurd wekî hevkar û dost dibînin; û qonaxa dîtina Kurd wekî biyanî bi dawî bûye, ku ev jî cihê pesin û pêzanînê ye ku Serok Bafil û YNK karîne vê destkeftiya girîng ji bo Kurd û Kurdistanê bidest bixin.

Ji aliyekî din ve, Yekîtiya Nîştimanî ya Kurdistanê (YNK) her timî ji bo biserxistina ramanên demokratîk xebat kiriye, ku bi vî awayî ew ji partiyên din yên siyasî yên Kurd cuda ye,û YNKê wek her partiyekî din rû bi rûyê nakokî, fişarên navxweyî û navneteweyî û fişarên rêveberiyê bûye, ji ber vê yekê, Kak Bafil dikare bi vê rola xwe ya nû pêgeha YNKê li navxwe û derveyî welêt jî bi hêz bike.Her wiha dikare nîşan bide ku Sosyal-Demokrasî ne tenê diruşim û ramanek e, ew riyek e jî ji bo çaksaziya siyasî.

Ez piştrasim ev rê hêsan nabe û dê tejî astengî  be ji bo kak Bafil bi sedema pirbûna hevrikî û pirsgirêkên cûr bi cûr yên navçeyê,lê çawa bi xwe di dema pêşkêşkirina gotara hilbijartinê de amaje bi wê yekê kiribû ku, pêwîste ev hevpeymanî nebe bazarek ji bo gotardayînê, beku pêwîste ew bibe platfoeumek ji bo karê hevbeş û hevdengî û siyaseta rastîn.

Di dawiyê de ez dixwazim bêjim ku hilbijartina Kak Bafil hem şanazî û hem jî berpirsyartiyek e mezin e.

Ev qonaxa nû ji bo wî deriyek e ji bo nêrîna xwe li ser pirsgirêkên hevbeş yên yên Kurd û Ereb pêşkêş bike ku ew jî ev in: Hejarî, ne yeksanî, bê hêvîbûn û hwd; her weha ev yek dikare vê qonaxa nû bike xalek werçerxanê ji bo pratîkkirina ramana û yekxistin û komkirina cudahîyan di bin sîwanekê de, pêwîstiya herêm bi serkirdayetiyekê heye ku hêvî û bawerî û yekrêziyê di dilê xelkê de dirust bike,ez piştrast im ku Kak Bafil dikare bislemîne ku ev pêgeh ne tenê sernavek e, lê ji bo Sosyal Demokrat li cîhana Ereban serdemek nû ye.

PUKEMDIA