Di roja 6ê Kanûn`ê de rojek ji bo Pêşmerge jî

Îmad Ehmed

Weke gelê Kurd gelek bîranînên me hene, piraniya wan tal û hinek jî şîrîn, carinan serdest in û bîrê li ser me zal dikin... Belkî em jê re bibêjin yadweriya ne çarî.

Di 6ê Kanûna Pêşîn ya sala 1921 an de, bi pêşengiya Cefer Eskerî, kurdekî Kerkûk`ê, artêşa Êraq`ê ji aliyê komek azadîxwaz û welatparêzên payebilind ku piraniya wan kurd in, hat avakirin.

Ji serdema padîşahiyê ve û heya îro, her sal di 6ê Kanûn`ê de li seranserê Êraq`ê, tevî cudahiyên di sîstem û rêbaza rêveberiyê de, ew salveger tê pîrozkirin.

Dîroka vê artêşê tijî bûyerên tal û şêrîn e, mixabin ev artêş ji bilî derbeyên li pey hev li hundirê Êraqê û tepeserkirina şoreşên Başûrê Kurdistan`ê, beşdarî hinek şerên curbicur yên Êraq`ê û navçeyê bûye.

Ev artêş nebû artêşeke niştimanî ji bo hemû pêkhateyên Êraq`ê, mixabin di destê rejîman de bûye alaveke kujer ji bo tepeserkirina gelê Êraq`ê.

Ji bo me Kurdan, ji ber zilma dîrokî ya li ser me, dibe ku em nezanin ji bo vê salvegerê çi bêjin? Werin em wê cejneke netewî ya rewa bihesibînin û pîroz bikin, yan jî cil û bergên reş li xwe bikin û ji bo wê şînê bigrin û bi hatina rojên zilmê re li ser me bin!

Bi kurtî û Krmancî ne hêsan e ku meriv vê salvegerê wekî şanazîyek netewî bibîne, çawa ku meriv ne hêsan e rola vê artêşê tenê di warê hovîtiya rejîman, jenosîd, enfal, kîmyabaran û şewitandina gundên me de bibîne û wê bi reftarên şovenîst yên desthilatdarên Êraq`ê yên li dijî gelê Kurd di dirêjahiya dîrokê de heta rûxandina Beisê tevlihev bikin!

Li vir rewa ye ku em pirsekê ji xwe bikin, çima rojek me ji bo bîranîna Pêşmerge nîne ku Pêşmerge sembola şoreş, têkoşîn û azadiya me ye?!

Gelo ev gunehê dijmin û dagîrkerên Kurdistan`ê ye yan jî encama xemsariya me û nakokiyên navxweyî ye!?

Li Kurdistan`ê kesek nîne ku rola Pêşmerge weke rizgarkerê parastina mafên rewa yên gelê Kurd û weke çeqê parastina Kurdistan`ê li hember dijminan nizanibe, jixwe di rojên tarî û dijwar yên Kurdistan`ê de ronahiya qada şerê berxwedanê û hêzên parastina gel in.

Pêşmerge xwedî dîrokek xwe ya dûr û dirêj a têkoşînê heye, ji bo mafên rewa yên gelê Kurd bi hezaran can dane û rûbarek xwînê daye û bi hezaran jî astengdar bûne.

Îcar çi mafê hêzên Pêşmergeyên Kurdistan`ê heye ku di warê mûçe, jiyan û debara jiyanê de di nava jiyaneke bi perîşan û mirinê de bin?!

Li vir tevî rêzgirtina hemû rojên me û bibîranîna curbicur di van rojan de û li Herêma Kurdistan`ê bo çîn û beşên cuda, lê sembola Pêşmerge ya azadîxwaz û tekoşîna pîroz a gelê Kurd rojek nemaye ku qurbaniyên xwe bi bîr bîne? !

Gelo bi rastî ne rewa ye ku piştî derbasbûna zêdetir ji 30 salan ji damezrandina Hikûmeta Herêma Kurdistan`ê û hebûna dezgeha serokatuyên herêmê û saziyên din yên desthilata me, rojekê ji bo Pêşmerge diyar bikin?

Gelo erkê exlaqî û niştimanî yên hemû partî, rêxistin û civaka sivîl li Kurdistan`ê bi giştî û serokatiyên herêmê ye?
Ma ne bi taybetî pêkanîna vê daxwazê ye?

Girîng e bi destpêkirina civîn û çalakiya şeşem a Parlemana Kurdistan`ê re ji bo cîbicîkirina vê erkê netewî destpêşxeriyek bê kirin, lewra ev rûniştina parlemanê dê di karê yasayî yê Kurdistan`ê de serweriyeke dîrokî hebe û giyanê hemû şehîdan û dilê Pêşmergeyên qehreman jî şad bike.

Bê guman em hêvîdar in ku ev yek rê li ber yekgirtina hêzên Pêşmergeyên Kurdistanê veke, ku ev yek daxwaza hemû gelê Kurd e û garantiya parastina pêkhateyên herêmê û bingeheke bingehîn a serkeftina li dijî pîlana dijminan e.

PUKMEDIA