راگه‌یاندنی مه‌كته‌بی سیاسی راگه‌یه‌ندراوێك بڵاوده‌كاته‌وه‌

راگه‌یه‌ندراوێك له‌ راگه‌یاندنی مه‌كته‌بی سیاسییه‌وه‌

راگه‌یاندنی مه‌كته‌بی سیاسی یه‌كێتیی نیشتمانیی كوردستان، له‌باره‌ی كاره‌ساته‌ قێزه‌ ونه‌كه‌ی پیرسۆس، كوردستانی باكوور راگه‌یه‌ندراوێك بڵاوده‌كاته‌وه‌، له‌ راگه‌یه‌ندراوه‌كه‌دا هاتووه‌، یه‌كێتیی نیشتمانیی كوردستان، یه‌كه‌مین هێزی كوردستانی و عیراقی بوو، ستراتیژی دژه‌ تیرۆری له‌سه‌ر ئاستی دونیاو ناوچه‌كه‌، راگه‌یاند.

ده‌قی راگه‌یه‌ندراوه‌كه‌..
سه‌ركه‌وتنه‌كانی پێشمه‌رگه‌ له‌باشورو تێكشكاندنی داعش له‌شه‌ڕگه‌كانداو هه‌ڵمه‌ته‌ به‌رده‌وامه‌كانی یه‌په‌گه‌و یه‌په‌ژه‌ له‌ڕۆژئاواو شه‌كاندنه‌وه‌ی ئاڵای ئازادی له‌كانتۆنه‌كاندا، دوژمنانی دیموكراسی هه‌ره‌سان كردووه‌. به‌تایبه‌تی داعشه‌كان. بۆیه‌، هه‌تا دێت، كه‌ له‌سه‌نگه‌رو شه‌ڕگه‌كاندا تێكده‌شكێن، په‌نا بۆ بڕیاری سه‌له‌فیانه‌ی فاشی ده‌به‌ن و ده‌كه‌ونه‌ ره‌شه‌كوژی له‌ناو شارو شارۆچكه‌كاندا.

له‌خانه‌قین، كه‌ركوك، مه‌خمور، خازر، به‌نداوی موسڵ، سه‌ری كانی، كۆبانی، گرێ سپی، حه‌سه‌كه‌و گونده‌كانی رۆژئاوا، كاتێك له‌به‌رامبه‌ر پێشمه‌رگه‌و شه‌ڕڤانان خۆیان ناگرن، كه‌چی وه‌كو پیشه‌ی هه‌میشه‌یی قێزه‌ونیان، له‌ناو خه‌ڵكی مه‌ده‌نیدا، رقی سه‌له‌فی ره‌شه‌كوژی ده‌ڕێژن.
تاوانی (پیرسۆس) درێژه‌ی زنجیره‌ی تاوانه‌كانی ئه‌م جانه‌وه‌رانه‌یه‌، كه‌ جگه‌ له‌زمانی تاوان و تاڵان و فڕاندنی ژنان و لاوان، هیچ كرده‌وه‌یه‌كی دیكه‌یان لێ چاوه‌ڕوان ناكرێ. شه‌نگال و شه‌نگالییه‌كان و خه‌ڵكی ته‌له‌عفه‌رو ده‌وروبه‌ری، نمونه‌ی ئه‌و تاوانانه‌ن.

ئه‌م تاوانانه‌، ده‌وڵه‌ته‌ گه‌وره‌كانی جیهان، ناوچه‌كه‌، عیراق و حكومه‌تی هه‌رێم، جارێكی دیكه‌ ده‌خاته‌وه‌ به‌رده‌م به‌رپرسیارێتی سیاسی، ئه‌منی، مرۆیی و ئیداری، كه‌ پێویسته‌ سه‌رله‌نوێ، به‌سیاسه‌ت و نه‌خشه‌ عه‌سكه‌رییه‌كانیاندا، له‌به‌ر رۆشنایی تاقیكردنه‌وه‌كانی شه‌ڕی دوو ساڵه‌، له‌گه‌ڵ داعشه‌كاندا بچنه‌وه‌. ته‌ركیز بكرێته‌ سه‌ر زانیاری وردترو زۆرتر له‌سه‌ر پیلانه‌كانی داعش و جموجۆڵ و هێرشه‌كانیان؛ نه‌خشه‌ی عه‌سكه‌ری شه‌ڕی ناو به‌ناو، هه‌رچه‌نده‌ زیانی زۆری له‌داعشه‌كان داوه‌، به‌ڵام ده‌ریشكه‌وت ئه‌م جۆره‌ شه‌ڕانه‌ و هێرشی ئاسمانیش، توانای هێرش و به‌رگری داعشه‌كانی هه‌تا ئێستا، ته‌واو په‌ك نه‌خستووه‌. بۆیه‌، بۆ تێكشكاندنی یه‌كجاره‌كی داعشه‌كان، ستراتیژێكی هاوبه‌شی (سیاسی- عه‌سكه‌ری- ئیستخباراتی) نوێ له‌نێوان وڵاتانی رۆژئاواو ئیقلیمدا، سه‌ره‌ڕای ناكۆكی و جیاوازییه‌كانیان، بۆته‌ پێویستییه‌كی چاره‌نوسسازی دیموكراسی و ئاشتی و ئارامی جیهان.

تاقیكردنه‌وه‌ ده‌ریخست، خۆدزینه‌وه‌ له‌شه‌ڕی داعش، دادی هیچ وڵاتێكی ئیقلیمی و رۆژهه‌ڵاتی ناوه‌ڕاست نادات. ئه‌م ئاگره‌ خۆكوژییه‌، هه‌تا زوو، به‌جه‌نگێكی فراوان و ستراتیژێكی هه‌مه‌لایه‌نه‌، كۆتایی نه‌یه‌ت، ئاگری جه‌نگه‌كه‌، له‌مه‌ زیاتر، وڵاتانی دوورو نزیكی شه‌ڕی داعش، ده‌سوتێنێ. چالاكی خۆكوژیش له‌ڕۆژئاوادا زیاتر ده‌كه‌ن.

یه‌كێتیی نیشتمانیی كوردستان، له‌كاتێكدا، له‌دوای كاره‌ساتی (11)ی سێپتێمبه‌ره‌وه‌، یه‌كه‌مین هێزی كوردستانی و عیراقی بووه‌، ستراتیژی دژه‌ تیرۆری له‌سه‌ر ئاستی دونیاو ناوچه‌كه‌، راگه‌یاندووه‌و ساڵه‌هاش، له‌ناوچه‌كانی هه‌ڵه‌بجه‌، تیرۆر زه‌ده‌ی تیرۆریستان بووه‌، كه‌ داعشیش له‌سه‌ره‌تاوه‌ سه‌ری هه‌ڵدا، سێ مانگ پێش په‌لاماری شه‌نگال، مه‌ترسی هێرش كردنه‌ سه‌ر عیراق و كوردستانمان خستۆته‌روو، كه‌ موسڵیشیان داگیركرد، پێش داگیركردن شه‌نگال، جه‌ختمان كرده‌وه‌، كه‌: پێویسته‌ له‌به‌رامبه‌ر داعشه‌ دڕنده‌كاندا، هێرش رابگه‌یه‌ندرێ. به‌رده‌وام گوتومانه‌: داعش، نه‌دۆستی هه‌یه‌و نه‌ سنوری جوگرافیای وڵاتانیش ده‌ناسێ.

سه‌ره‌ڕای ئه‌وه‌ی هه‌تا هاتووه‌، شه‌ڕی دژه‌ شه‌ڕی داعش، گه‌رمتر ده‌بێ، به‌ڵام هێشتا پێمانوایه‌، ستراتیژی هه‌تا ئێستا په‌یڕه‌و كراو، ئامانجه‌ عه‌سكه‌رییه‌كانی به‌ته‌واوه‌تی نه‌ك نه‌پێكاوه‌، به‌ڵكو هێشتا داعش، سه‌ر زه‌مینێكی فراوانی به‌ده‌سته‌وه‌یه‌و توانای مانۆڕو هێرشی كه‌م نییه‌. عه‌مه‌لیاته‌ خۆكوژییه‌كانیشیان مه‌ترسی گه‌وره‌ن له‌سه‌ر عیراق، كوردستان، سوریاو رۆژئاوای كوردستان، ئه‌وه‌تا په‌ڕینه‌وه‌ بۆ ناو توركیاش، ئه‌مه‌ جگه‌ له‌و عه‌مه‌لیاتانه‌ی له‌وڵاتانی دیكه‌ش ئه‌نجامیده‌ده‌ن. حاڵیش وا بڕوات، له‌وڵاتانی تری ناوچه‌كه‌و دونیادا، كاری تیرۆریستی ترسناكتر به‌دور نه‌زانرێ!

له‌م كاته‌دا، ئیدانه‌ كردن، گه‌ر بۆ ته‌سه‌لای لێقه‌وماوان و رۆحی پاكی شه‌هیدان، باشبێ، به‌ڵام بڕیار به‌ده‌ستانی ناوچه‌كه‌و جیهان، ئێستا له‌هه‌موو كاتێك زیاتر، پێویستیان به‌لێكتێگه‌یشتنی عه‌سكه‌ری و ئه‌منی هه‌یه‌، هه‌تا ستراتیژی ته‌فروتوناكردنی ئه‌م دوژمنانه‌ی مرۆڤایه‌تی و ئازادی، داڕێژن. به‌تایبه‌تی، رێككه‌وتننامه‌ی (5+1)ی رۆژئاواو كۆماری ئیسلامی ئێران، ده‌رگای ئه‌گه‌ری جۆراوجۆری سیاسی، عه‌سكه‌ری، ئیستخباراتی و ئیداری، له‌نێوان رۆژئاواو ده‌وڵه‌تانی ئیقلیمدا، كردۆته‌وه‌. ره‌نگدانه‌وه‌ی رێككه‌وتنه‌ش هه‌مه‌لایه‌نه‌یه‌. ناكرێ دیوێكی ببینرێ و دیوه‌كانی تری فه‌رامۆش بكرێن. هه‌موانیش ده‌زانین كه‌ جه‌نگه‌كه‌ش جه‌نگێكی ته‌مام عه‌یاره‌، بۆیه‌، چیكه‌، پاساوی خۆ دزینه‌وه‌ له‌ستراتیژێكی هاوبه‌شی جیهانی و ئیقلیمی، دادی هیچ وڵاتێك نادات. به‌ڵكو زیانی زیاتریشیان پێده‌گه‌یه‌نێ. چونكه‌، هه‌تا ئێستا، نه‌ك نه‌بونی ئه‌و ستراتیژه‌ هاوبه‌شه‌، به‌ڵكو ناكۆكی سیاسی وڵاتانی ئیقلیمیش، سه‌باره‌ت به‌داعش و مه‌ترسییه‌كانی، هه‌روه‌ها كێشمه‌كێشه‌كانی تری نێوان وڵاتانی ناوچه‌كه‌، ده‌رفه‌تی باشیان بۆ مانۆری عه‌سكه‌ری و، هێرشی عه‌سكه‌ری و، هێنان و، بردنی تیرۆریستان، له‌سه‌رانسه‌ری جیهانه‌وه‌ بۆ ناو داعشه‌كان.. ره‌خساندووه‌، زیاتر (20) هه‌زار تیرۆریستی داعش له‌رۆژئاواوه‌، چۆن په‌یوه‌ست ده‌بن به‌داعشه‌وه‌، ئه‌گه‌ر ده‌یان كه‌لێن له‌فڕۆكه‌خانه‌كان و سنوره‌كان و لێره‌و له‌وێ هاوكاری كردنیان نه‌بوبێ؟!
جه‌ماوه‌ری خۆڕاگر!

ئێمه‌ دڵنیاین، ئه‌م جۆره‌ تاوانانه‌، كه‌ له‌م كاته‌دا، به‌مه‌رام له‌باكوری كوردستان و له‌به‌رامبه‌ر كۆبانێدا، ئه‌نجامدراوه‌، جگه‌ له‌وه‌ی ئیراده‌ی نه‌ته‌وه‌كه‌مان له‌پێناوی رزگاری و ئازادی به‌تینتر ده‌كات، له‌هه‌مانكاتدا، خه‌سڵه‌تی ئه‌م جه‌نگانه‌ وه‌هایه‌، كاره‌ساته‌كان، باشتر هێزه‌كان جۆش ده‌دات و یه‌كخستنی هێزه‌ ده‌وڵه‌تی و ئیقلیمی و نه‌ته‌وه‌كه‌شمان، ده‌كاته‌ ئۆباڵی مێژوویی و خۆدزینه‌وه‌ش له‌و ئۆباڵه‌، ده‌بێته‌ مایه‌ی سه‌ركه‌وتنی دوژمنانی دیموكراسی.
-نه‌مری بۆ شه‌هیدانی پیرسۆس
-بێته‌دی به‌ره‌ی فراوانی دژه‌ داعش

راگه‌یاندنی مه‌كته‌بی سیاسی
یه‌كێتیی نیشتمانیی كوردستان
 (21/7/2015)

PUKmedia