لەم قەزایە پشكنینی پێش هاوسەرگیری ئەنجامدەدرێت

پێویست ناكات هاووڵاتیان بۆ ئەو پشكنینانە سەردانی سلێمانی بكەن

ئەمڕۆ 2015/6/29 د.میران محەمەد بەڕێوبەری گشتی تەندروستی سلێمانی بەیاوەری قائیمقامی قەزای دەربەندیخان و لێپرسراوانی دیكەی تەندروستی، نەخۆشخانەی گشتی دەربەندیخان و كلینیكی راوێژكاری شەهید ئازادی مامە عەلەو پرۆژەی ئاوی خواردنەوەی قەزاكەی بەسەركرایەوە.

لەوبارەوە د.میران محەمەد بەڕێوبەری گشتی تەندروستی سلێمانی رایگەیاند: نەخۆشخانەی گشتی و كلینیكی راوێژكارییەكەیان هەندێك كەموكورتی و پێداویستیان هەبوو، ئێمەش بۆمان جێبەجێكردن وەك دابینكردنی دەرمان و ئامێرو پێداویستی تاقیگەیی و ئەمبوڵانسی تایبەت بەگواستنەوەی تەرم.

راشیگەیاند:هاووڵاتیان كێشەی حەشەراتیان هەبوو بەتایبەت كە وەرزەكە زۆر گەرمە، بۆیە بڕیارماندا كاری رشاندن بۆ ناوچەكە بكرێت بۆ پاراستن و سەلامەتی تەندروستی هاووڵاتیان، هەر لەو پێناوەشدا پشكنین بۆ رێژەی كلۆرو ئاوی خواردنەوەی دەربەندیخان ئەنجامدرا.

بەڕێوەبەری گشتی تەندروستی سلێمانی رونیشیكردەوە: لەئایندەیەكی زۆر نزیكدا لە قەزای دەربەندیخان كلینیكی راوێژكاری تایبەت بەهاوسەرگیری دەكەینەوە، تێیدا پشكنینی پێش هاوسەرگیری بۆ هاووڵاتیانی ناوچەكە ئەنجام دەدرێت، ئیتر هاووڵاتیان پێویست ناكات بۆ ئەو پشكنینانە سەردانی سلێمانی بكەن. 

PUKmedia تایبەت