ئاسایشی سلێمانی پارێزگار خه‌ڵات ده‌كات

شانازی به‌ ئاسایشی سلێمانییه‌وه‌ ده‌كه‌م

ئه‌مڕۆ 21-10-2014 حه‌سه‌ن نوری به‌ڕێوه‌به‌ری ئاسایشی سلێمانی و ژماره‌یه‌ك له‌ به‌ڕێوه‌به‌ره‌كانی به‌شه‌ جیاجیاكانی ئاسایشی سلێمانی، سه‌ردانی به‌هرۆز محه‌مه‌د ساڵح پارێزگاری سلێمانیان كرد.

له‌ سه‌ردانه‌كه‌دا لێپرسراوانی ئاسایشی سلێمانی له‌ به‌رامبه‌ر هه‌وڵ و هاوكاری و پشتیوانییه‌كانی پارێزگاری سلێمانی بۆ راپه‌ڕاندنی كارو ئه‌ركه‌كانیان، خه‌ڵاتی رێزلێنانیان پێشكه‌شی پارێزگار كرد، هه‌روه‌ك سوپاس و پێزانینی خۆیان پێڕاگه‌یاندو ده‌ستخۆشیان لێكرد بۆ به‌ ته‌نگه‌وه‌چوونی كاره‌كانیان.

له‌ به‌رامبه‌ردا پارێزگاری سلێمانی وێڕای سوپاس و پێزانین بۆ خه‌ڵاته‌كه‌یان، رایگه‌یاند: شانازی به‌ ئاسایشی سلێمانییه‌وه‌ ده‌كه‌م و سوپاس و ده‌ستخۆشی له‌ یه‌ك به‌یه‌كی كارمه‌ندانیان ده‌كه‌م، هه‌روه‌ك ئاسایشی سلێمانی له‌نێو شاره‌كانی هه‌رێمی كوردستان عیراقدا نمونه‌ن و توانیویانه‌ به‌ ئیمكانیه‌تی كه‌م ئه‌منیه‌تی شاره‌كه‌و هاووڵاتیان بپارێزن و سه‌دان تاوانی گه‌وره‌و بچوك ئاشكرا بكه‌ن.

پارێزگار ئاماژه‌ی به‌وه‌شكرد كه‌ ئارامی و ئاسایش له‌پێش هه‌موو شتێكه‌وه‌و جێگه‌ی ده‌ستخۆشی و رێزگرتنیشه‌ كه‌ ئاسایشی سلێمانی به‌ شه‌ونخونی و ماندوبوونی خۆیان توانیویانه‌ ئه‌و ئامانجه‌ بۆ شاره‌كه‌یان ده‌سته‌به‌ربكه‌ن، به‌جۆرێك شاره‌كه‌ بووه‌ته‌ لانه‌یه‌كی ئارام بۆ هه‌موو ئه‌و كه‌سانه‌ی له‌به‌ر خراپی دۆخی ئه‌منی ماڵ و حاڵی خۆیان به‌جێهێشتووه‌.

وتیشی: له‌ ماوه‌ی چوار ساڵی رابردوودا هه‌ماهه‌نگییه‌كی باش له‌ نێوان ئاسایشی و پارێزگادا هه‌بووه‌و ئه‌مه‌ش جێگه‌ی ده‌ستخۆشی و سوپاسه‌و هیوای خواست به‌رده‌وام و سه‌ركه‌وتووبن له‌ راپه‌ڕاندنی ئه‌ركه‌ پیرۆزه‌كه‌یاندا.

له‌ ته‌وه‌رێكی تری دیداره‌كه‌دا لێپرسراوانی ئاسایشی سلێمانی تیشكیان خسته‌سه‌ر به‌شێك له‌ كارو چالاكییه‌كانیان و دۆزینه‌وه‌ی رێوشوێنی گونجاوتر بۆ رایكردنی ئه‌ركه‌كانیش گفتوگۆی له‌سه‌ر كرا.

PUKmedia تایبه‌ت