د.نه‌جمه‌دین و میر ته‌حسین پیرۆزبایی له‌ د.فوئاد مه‌عسوم ده‌كه‌ن

د.فوئاد مه‌عسوم سه‌رۆك كۆماری عیراق

به‌بۆنه‌ی هه‌ڵبژاردنی د.فوئاد مه‌عسوم به‌ سه‌رۆك كۆماری نوێی عیراق، هه‌ریه‌ك له‌ د.نه‌جمه‌دین كه‌ریم پارێزگاری كه‌ركوك و میر ته‌حسین سه‌عید عه‌لی میری گه‌وره‌ی ئێزدیان له‌ عیراق و جیهان په‌یامی پیرۆزبایی ئاڕاسته‌ ده‌كه‌ن.

* په‌یامی د.نه‌جمه‌دین كه‌ریم پارێزگاری كه‌ركوك:
فه‌خامه‌تی‌ به‌ڕێز سه‌رۆك د.فوئاد مه‌عسوم سه‌رۆكی‌ كۆماری‌ عیراق.
به‌ ناوی‌ خۆم و هاووڵاتیانی‌ كه‌ركوك‌ شاره‌ خۆشه‌ویسته‌كه‌ی‌ دڵی‌ هه‌موومان، جوانترین پیرۆزبایی‌ ئاڕاسته‌ی‌ به‌ڕێزتان ده‌كه‌ین به‌بۆنه‌ی‌ هه‌ڵبژاردنتان به‌ سه‌رۆك كۆماری‌ عیراق و داواكارین له‌ خوای‌ گه‌وره‌ پشتیوانی‌ هه‌نگاوه‌كانتان بێت بۆ چاكردنه‌وه‌و سه‌ركه‌وتنی‌ پرۆسه‌ی‌ سیاسی عیراق، متمانه‌ی‌ زۆرمان هه‌یه‌ به‌ تواناو پێگه‌ی‌ به‌ڕێزتان له‌ ساڵانی‌ درێژی‌ خه‌بات و روبه‌ڕوبوونه‌وه‌ی‌ زۆرداری‌ و دكتاتۆریه‌ت، هیوامان زۆره‌ گرنگی‌ بده‌یت به‌ كه‌ركوك وه‌ك پێشترو هاوكارو پشتیوانی‌ شاره‌كامان بیت و سه‌ردانی‌ بكه‌یت.
ئه‌م رۆژه‌ قۆناغێكی‌ نوێیه‌ له‌ مێژووی‌ عیراق و هه‌ڵبژاردنی‌ به‌ڕێزتان فاكته‌رێكی‌ تره‌ له‌ هه‌ستكردن به‌ به‌رپرسیارێتی‌ له‌ روبه‌ڕوبوونه‌وه‌ی‌ به‌ره‌نگاریه‌كان و چاره‌سه‌ركردنی‌ كێشه‌كان و ئێمه‌ی متمانه‌مان هه‌یه‌ به‌ تواناو ئه‌زمونی‌ گه‌ره‌ی‌ جه‌نابتان.

* په‌یامی میر ته‌حسین سه‌عید عه‌لی میری گه‌وره‌ی ئێزدیه‌كانی عیراق و جیهان:
له‌ كانگای دڵمه‌وه‌و له‌بری ئێزدیه‌كانی عیراق و جیهان به‌بۆنه‌ی وه‌رگرتنی پۆستی سه‌رۆك كۆماری جوانترین پیرۆزبایی ئاڕاسته‌ی د.فوئاد مه‌عسوم ده‌كه‌م، داوا له‌ خوای گه‌وره‌ ده‌كه‌م كاندیدكردنی به‌ڕێزیان ببێته‌ دۆعای خێر بۆ ته‌واوی عیراق، هیوای سه‌ركه‌وتن و كاركردنی به‌رده‌وامی بۆ فه‌خامه‌تیان ده‌خوازم له‌ پێناو عیراقێكی ئاسوده‌و ئارامدا.

PUKmedia   تایبه‌ت