قائیمقامی سلێمانی: ھەر شوێنێك پابەند نەبێت سزا دەدرێت

.

قائیمقامی سلێمانی رایگەیاند، رۆژانە ژمارەی توشبوانی كۆرۆنا لە زیادبوندایەو خۆپارێزی و پابەند بوون بەڕێنماییەكان باشترین رێگەچارەیە بۆ رێگریكردن لە بڵاوبونەوەی زیاتری كۆرۆنا و كەمكردنەوەی ژمارەی قوربانیان. 

ئەمرۆ دوو شەممە (19 نیسانی 2021) ئاوات محەمەد قائیمقامی سلێمانی لەگەڵ خاوەنی ھۆڵەكانی وەرزش و لەشجوانی كۆبویەوە و رایگەیاند: بەداخەوە جارێكی تر ڤایرۆسی كۆرۆنا رووی لەھەڵكشان كردووەتەوەو بەھۆیەوە ژمارەی توشبوان و قوربانیان بەرزبووەتەوە، ئەگەر رێگەكانی خۆپارێزی لە ئاستێكی بەرزدا لەبەرچاونەگیرێت ناوەندە تەندروستییەكان توانای چارەسەركردنی ھەموو توشبوانی نابێت و ئەوكات ئەگەری كارەساتێكی مرۆیی بەدوور نازانرێت.

 قائیمقامی سلێمانی وتیشی: بۆ ئەوەی نەگەینە ئەو قۆناغە مەترسیدارە پێویستە لەسەر ئاستی تاك و ھەموو ئەو شوێنانەی كە رێگەبەكاركردنیان دراوە پابەندی رێنماییە خۆپارێزییەكان بن. 

ئاوات محەمەد قائیمقامی سلێمانی ئاماژەی بۆ ئەوەشكرد نامانەوێت ئاستەنگ لەبەردەم كاركردن و بژێوی ژیانی خەڵك دروست ببێت، بۆ ئەوەی كارو كاسبی خەڵك بەردەوام بێت و جارێكی تر ژیان و كاری خەڵك پەكی نەكەوێت پێویستە ھەموان لە ئاستی بەرپرسیارێتیدا بین و خۆپارێزی لە ئاستی باڵادا لەبەرچاوبگرین ، قائیمقامی سلێمانی راشیگەیاند: خوازیارین ناچار نەبین شوێنەكان بەھۆی پابەند نەبونیان دابخەین ، بەڵام ئەگەر كاركردنی ھەر شوێنێك ببێتە ھۆی بڵاوبوونەوەی كۆرۆنا ناچارین سزای ئەو شوێنانە بدەین كە پابەند نابن، داواشی لە ھۆڵەكانی وەرزش و لەشجوانی كرد بەتەواوی پابەندی رێنماییەكانی خۆپارێزی بن و نەبنە ھۆكاری بڵاوبوونەوەی كۆرۆنا بۆ ئەوەی بەپێی رێكارە تەندروستیەكان بەردەوامبن لە كاركردن. 

PUKmedia راگەیاندنی قائیمقامیەتی سلێمانی