عیراق چاو بە ژمارەیەك گرێبەستی نەوتیی دەخشێنێتەوە

.

وەزیری نەوتی عیراق رایگەیاند بەهۆی زۆری تێچوون لە ژمارەیەك كێڵگەی نەوت، وڵاتەكەی چاو بە گرێبەستیی نەوتیی ژمارەیەك لە كۆمپانیاكان دەخشێنێتەوە، ئەوەش بەمەبەستی كەمكردنەوەی خەرجیی و كەمكردنەوەی بەرهەمهێنان.

ئیحسان عەبدولجەبار وەزیری نەوتی عیراق راشیگەیاند تێڕوانینی وەزارەتەكەی ئەوەیە كە دەرگای دانوستاندن لەگەڵ كۆمپانیاكاندا بكاتەوە و گفتوگۆ لەسەر هەندێك لە گرێبەستە  نەوتییەكان بكرێت، وەزارەتیش هەنگاو بەرەو ئەوە دەنێت چاوخشاندنەوە بەو كێڵگە نەوتییانەدا بكات كە تێچوونی بەرهەمهێنان تیایاندا بەرزە.

عەبدولجەبار وتیشی: لە سەر سەرجەم پرۆسەكە لەگەڵ ئەو كۆمپانیا خزمەتگوزارییانەدا گفتوگۆ و توێژینەوە دەكات كە لەعیراقدا كار بۆ پێشخستنی كێڵگە نەوتییەكان دەكەن، هەڵسەنگاندن و چاوخشاندنەوە بۆ بەشێك لەو گرێبەستانە نەك هەمووییان دەكرێت.

   وەزیری نەوت ئەوەشی راگەیاند، لە بەرژەوەندی عیراقە كە ئەندامە لە رێكخراوی وڵاتانی بەرهەمهێن و هەناردەی نەوت(ئۆپیك) هەماهەنگی لەگەڵ كۆمەڵەی ئۆپیك پلاسدا بكات بەمەبەستی بەرزكردنەوەی نرخی بازاڕی نەوت.

پێشتر و لەم مانگەدا، عیراق بە رێكخراوی ئۆپیك پلاسی راگەیاندبوو كە دەست بە كەمكردنەوەی ئاستی بەرهەمهێنانی نەوت دەكات و دەیگەیەنێتە ئەو ئاستەی كە رێكخراوەكە بۆی دیاریكردووە، ئەمەش دوای ئەوە دێت كە كۆمەڵەكە بەهۆی پابەندنەبوونیانەوە داوایان لە بەغدا و چەند وڵاتێكی تر كرد پابەندی رێككەوتنیی كەمكردنەوەی بڕی بەرهەمهێنانی نەوت بن.

PUKmedia رۆیتەرز