به‌شیر حه‌داد: ده‌ستوه‌ردانه‌كانی توركیا ناوچه‌كه‌ ئاڵۆزتر ده‌كات

.

ئه‌مڕۆ شه‌ممه‌ 20 ی حوزه‌یرانی 2020 دكتۆر به‌شیر حه‌داد جێگری سه‌رۆكی ئه‌نجومه‌نی نوێنه‌رانی عیراق داوای له‌حكومه‌تی توركیا كردووه‌ هێرش و بۆردومانه‌كان بۆ سه‌ر ناوچه‌ سنوورییه‌كانی هه‌رێمی كوردستان رابگرێت كه‌ به‌هۆیه‌وه‌ زیانی گیانی و ماددی زۆری به‌ دانیشتوانی ناوچه‌كه‌ گه‌یاندوه‌ و ترس و دڵه‌ڕاوكێی بۆ هاووڵاتیان و دانیشتوانی ئه‌و ناوچانه‌ دروستكردووه‌.

دكتۆر حه‌داد راشیگه‌یاندوه‌، هێرشه‌ سه‌ربازییه‌كانی توركیا له‌دژی هێزه‌كانی پارتی كرێكارانی كوردستان به‌زاندنی سه‌روه‌ری عیراق و پێشێلكردنی رێككه‌وتن و به‌ڵگه‌نامه‌ نێوده‌وڵه‌تییه‌كانه‌. 

به‌گوێره‌ی بڵاوكراوه‌یه‌كی نووسینگه‌ رۆژنامه‌وانییه‌كه‌ی، حه‌داد رایگه‌یاندووه‌، به‌ردوامبوونی ده‌ستوه‌ردانه‌كانی توركیا له‌ خاكی هه‌رێمی كوردستانی عیراق، ئالۆزییه‌كان له‌ناوچه‌كه‌دا زیاتر ده‌كات و كاریگه‌ریی نه‌رێنیش له‌سه‌ر په‌یوه‌ندییه‌كانی نێوان هه‌ردوو وڵاتی دراوسێ دروست ده‌كات.

جێگری سه‌رۆكی ئه‌نجومه‌نی نوێنه‌ران داوا له‌حكومه‌تی عیراق ده‌كات رێوشوێنی پێویست بۆ رێگریكردن له‌دووباره‌بوونه‌وه‌ی ئه‌و هێرش و ده‌ستدرێژییانه‌ بگرێته‌به‌ر و رێوشوێنی پێویست له‌پێناو پاراستنی سنووره‌كان و سه‌روه‌ری عیراق بخاته‌كار.

حه‌داد داوا له‌حكومه‌تی توركیا ده‌كات به‌په‌له‌ سه‌رجه‌م ئۆپراسیۆنه‌ سه‌ربازییه‌كان  رابگرێت و چاره‌سه‌ری كێشه‌كانی له‌گه‌ڵ ئۆپۆزسیۆنی وڵاته‌كه‌ی به‌ڕێگه‌ی گفتوگۆی جددیانه‌ چاره‌سه‌ر بكات و سه‌قامگیریی بۆ ناوچه‌كه‌ بهێنێته‌ ئاراوه‌و چیتر هاووڵاتیانی بێتاوان نه‌كرێنه‌ ئامانج و رێز له‌سه‌روه‌ری عیراق بگیرێت.

PUKmedia نوسینگه‌ی راگه‌یاندنی جێگری سه‌رۆكی ئه‌نجومه‌نی نوێنه‌رانی عیراق