جەخت لەخۆ رێكخستنەوەی هێزەكانی پێشمەرگە دەكرێتەوە.

.

وەزیری پێشمەرگه، رایدەگەینێت: هەنگاوەكانی پڕۆسەی چاكسازی لەناو هێزەكانی پێشمەرگە خێراتر دەكەین و لەسەر هەمووانە، رووبەڕوی ئاستەنگ و لەمپەڕەكان ببێتەوە.

ئەم وتانەی شۆڕش ئیسماعیل، وەزیری پێشمەرگەی حكومەتی هەرێمی كوردستان، ئەمڕۆ ٢٨/١/٢٠٢٠ لەمیانی كۆبوونەوەیەكیدا هات، كە لەگەڵ  فەرماندە و نوێنەرانی هێزەكانی ٧٠ و ٨٠ ی هێزەكانی پێشمەرگە بەڕێوەچوو. 

لەو كۆبوونەوەیەدا، كە سەربەست لەزگین بریكاری وەزارەت و فەرماندەی یەكەی ٨٠ و نوێنەری فەرماندەی یەكەی ٧٠ و فەرماندە و بەرپرسانی پلە باڵای وەزارەت ئامادەیبوون. وەزیری پێشمەرگە ئاماژەی بە هەنگاوەكانی پڕۆسەی چاكسازی كردو راشیگەیاند: بڕیاری پڕۆژە یاسای چاكسازی حكومەت و پەسندكراوی پەرلەمانی كوردستان پابەندمان دەكات بەوەی هەمووان بەگیانی لێپرسراویەتیەوە رێگاكان كورتتر بكەینەوەو هەنگاوەكان خێراتر بكەین. روونیشی كردەوە: دەرفەتێكی گونجاو بۆ جێبەجێكردنی ئەو پڕۆسەیە هاتۆتە پێشەوەو وێڕای هاوكاری و هەماهەنگی هاوپەیمانان، ئیرادەیەكی بەهێزی سیاسیی لایەنە سیاسیەكان و سەرۆكایەتی هەرێم و سەرۆكایەتی ئەنجومەنی وەزیران هەیە.  

هەر لەو كۆبوونەیەدا، بریكاری وەزارەتی پێشمەرگە و فەرماندەی یەكەی ٨٠ و نوێنەرانی فەرماندەیی یەكەی ٧٠  گفتۆگویان لەسەر دواین پڕۆژەی پێشنیاركراوەكان بۆ جێبەجێكردنی یەكخستنەوەی تەواوەتی هێزەكان لەژێر چەتری وەزارەتی پێشمەرگه كرد. هاوكات هەمووان كۆك و هاوڕابوون لەسەر جێبەجێكردنی پڕۆسەكە و لابردنی ئاستەنگ و لەمپەرەكان. پابەندی خۆشیان بۆ بڕیار و راسپاردەكانی وەزارەتی پێشمەرگە دوپاتكردەوە. 

لەكۆتایی كۆبوونەوەكە، وەزیری پێشمەرگە بەئامادەبووانی راگەیاند: بە ئاستی لێپرسراوێیەتیەوە لە پڕۆسەكە دەڕوانین و ئەركی هەمووانە بە جدی كار لەسەر ئالیەت و میكانیزمی قۆناغەكانی جێبەجێكردنی پڕۆسەكە بكات ، كە دەرئەنجام  دروستكردنی هێزێكی سەربەخۆ و یەكگرتووی لێدەكەوێتەوە.

PUKmedia راگەیاندنی وەزارەتی پێشمەرگە