پەرلەمانی عیراق کۆبوونەوەکانی دەستپێدەکاتەوە

راگەیاندنى ئەنجومەنى نوێنەران

وێنەیەکى کۆبوونەوەیەکى پێشترى پەرلەمان

هەفتەی داهاتوو ئەنجومەنی نوێنەرانی عیراق دانیشتنەکانی دەستپێدەکاتەوە و خوێندنەوەی یەکەم بۆ چەند پڕۆژەیاسایەک دەکات، بەڵام تا ئێستا کاتی دانیشتنی دەنگدان بۆ تەواوکردنی کابینەی حکومەت دیاری نەکراوە.

فەرمانگەی کاروباری پەرلەمانی لە ئەنجومەنی نوێنەرانى عیراق کارنامەی یەکەم دانیشتنی لە وەرزی دووەمی یاسادانان - ساڵی یەکەمی یاسادانان بڵاوکردەوە، کە بڕیارە رۆژی دووشەممە 6ى تەممووزی 2026 سەعات یەکى پاشنیوەڕۆ بەڕێوەبچێت، کارنامەکە لە 4 بڕگە پێکدێت و تێیدا خوێندنەوەی یەکەم بۆ چوار پڕۆژەیاسا دەکرێت.

کارنامەی دانیشتنەکە دەنگدان بۆ تەواوکردنی کابینەی وزاریی نوێ لەخۆناگرێت، ئەمەش لە کاتێکدایە کە هێشتا 9 وەزارەت بە وەکالەت بەڕێوەدەبرێن و وەزیرەکانیان نەیانتوانیوە متمانەی پەرلەمان بەدەستبهێنن لەو دانیشتنەی کە لە 14ی ئایاری 2026 بۆ دەنگدان لەسەر حکومەت بەڕێوەچوو.

PUKMEDIA