عیراق هەوڵدەدات رۆژانە 4.3 ملیۆن بەرمیل نەوت بەرهەمبهێنیت

راگەیاندنی وەزارەت

وەزارەتی نەوتی عیراق

وەزارەتی نەوتی عیراق هەوڵەکانی چڕکردووەتەوە بۆ بەرزکردنەوەی قەبارەی بەرهەمهێنانی نەوتی خاو بۆ نزیکەی 4.3 ملیۆن بەرمیل لە ڕۆژێکدا و پەرەپێدانی پرۆسەی هەناردەکردنی نەوتی وڵاتەکە.

نەسیر عەزیز بریکاری وەزارەتی نەوت بۆ کاروباری دەرهێنان، رایگەیاند: کاری لە پێشینەی ئێستامان نۆژەنکردنەوە و پەرەپێدانی کێڵگە نەوتییەکانی باشوورە، ئەو کێڵگانەی کە پێشتر بەهۆی لێکەوتەکانی شەڕی کەنداوەوە، وەزارەتەکە ناچار بوو ئاستی بەرهەمهێنانیان بە ڕێژەی جیاواز کەم بکاتەوە.

راشیگەیاند: داوامان لە کۆمپانیا نەوتییەکان کردووە بە خێرایی هەڵسەنگاندن بۆ کێڵگەکان بکرێت و ئاستی بەرهەمهێنان و هەناردەی نەوت بەرز بکرێتەوە، لەگەڵ چارەسەرکردنی سەرجەم لەمپەرە تەکنیکی و لۆجیستییەکان، بە ئامانجی دابینکردنی پێداویستیی پاڵاوگە ناوخۆییەکان و زیادکردنی هەناردەکردنی نەوت لە ڕێگەی بەندەرەکانی باشورەوە.

 بریکاری وەزارەتی نەوتی عیراق، دووپاتیشی کردەوە، کاری لە پێشینەمان ئەوەیە ئاستی بەرهەمهێنان بە قۆناغبەندی بگەیەنینەوە پێش قەیرانەکە، کە لە نێوان 4.2 بۆ 4.3 ملیۆن بەرمیلی رۆژانە بوو.

بریکاری وەزارەتی نەوت بۆ کاروباری دەرهێنان، ئاماژەی بە کێڵگەکانی دیکەش کرد و رایگەیاند: چاودێریکردنی ئاستی بەرهەمهێنان لە کۆمپانیای نەوتی باکور و گواستنەوەی نەوت لە کێڵگەكانی باشورەوە بەشێکی گرنگی پلانەکانی وەزارەتی نەوت پێکدەهێنیت، ئەمانجیش لەم پلانە پشتیوانیکردنی هەناردەی نەوتە لەرێگەی بەندەری جیهانی تورکییەوە، بەمەش هەمەجۆرکردنی هەناردەی نەوت دێتە کایەوە.

PUKMEDIA