عەلی زەیدی پێش سەردانەکەی بۆ واشنتن کابینەی حکومەتەکەی تەواو دەکات

واع

حەیدەر عەبودی وتەبێژی حکومەتی عیراق

عەلی زەیدی سەرۆکوەزیرانی عیراق، لە نیوەی مانگی داهاتوودا پێش سەردانەکەی بۆ واشنتن کابینەی حکومەتەکەی تەواو دەکات و لە کۆتایی ئەمساڵیشدا بوودجەی 2027 ئامادە دەکات.

 حەیدەر عەبودی وتەبێژی حکومەتی عیراق، لە کۆنگرەیەکی رۆژنامەوانیدا، رایگەیاند: پۆستە بەتاڵە وزارییەکان لە نیوەی مانگی حەوتدا پڕ دەکرێنەوە، بۆیە عەلی زەیدی سەرۆکوەزیران، پێش سەردانەکەی  بۆ ئەمریکا کە هەر لە نیوەی مانگی حەوتدایە، تەواوی پۆستەکان پڕ دەکاتەوە.

 لە بارەی ئەو پرسانەی لەمیانەی سەردانەکەی بۆ واشنتن باس دەکرێن، عەبودی رایگەیاند: کۆمەڵێک پرسی گرنگ باس دەکرێن، لەوانە پرسی ئابوری و کۆنترۆلی چەک تەنها لە دەستی دەوڵەتدا، کە ئەمەش بەرنامەی حکومییە بۆ سەقامگیری عیراق.

 پەیوەست بە گۆڕینی پۆستە ئەمنییەکانیش، وتەبێژی حکومەتی عیراق، رایگەیاند: گۆڕینی پۆستە ئەمنییەکان بەهۆی کەمتەرخەمی یان سزادانەوە نەبووە، بەڵکو حکومەتی عیراق تێڕوانینێکی نوێی بۆ بەڕێوەبردنی دامەزراوەکان هەیە.

لە بارەی لایەنی ئابوری عیراق و قەرزی دەرەکی بۆ پڕکردنەوەی کورتهێنانەکان، حەیدەر عەبودی وتەبێژی حکومەتی عیراق، رایگەیاند: حکومەتی عیراق پشتگیری لە قەرزی دەرەکی ناکات،چونکە عیراق وڵاتێکی هەژار نییە و چەندین رێگا چارەی دیکە هەیە بیگرێتە بەر، ئێستاش چەندین ئاماژە بۆ باشبوونی دۆخی ئابوری وڵات دەرکەوتوون.

 ئاشکراشی کرد: بوودجەی ساڵی 2027 تا مانگی 10ی ئەمساڵ ئامادە دەکرێت، بۆ ئەوەی پیشکەشی ئەنجومەنی نوێنەرانی عیراق بکرێت.

لە بارەی کۆمپانیاکانی نەوتیش کە لە هەرێم کار دەکەن، حەیدەر عەبودی رایگەیاند: حکومەت گەرەنتی تەواوی کۆمپانیان نەوتییەکان دەدات کە لە هەرێمی کوردستان کار دەکەن، چونکە ئەوە پەیوەستە بە مووچەی فەرمانبەرانی هەرێمی کوردستانەوە.

لە کۆتایشدا، حەیدەر عەبودی وتەبێژی حکومەتی عیراق، ئاشکرای کرد: عەلی زەیدی سەرۆکوەزیرانی عیراق، لە داهاتوودا پارتی سیاسی دانامەزرێنێت و خۆیشی بۆ هەڵبژاردنەکان کاندید ناکات.

PUKMEDIA