مووچەی زیندانیانی سیاسیی هەرێم لەگەڵ بەغدا هاوتا دەکرێت

میدیاکان

دراوی عیراقی

به‌ ئامانجی جێبەجێکردنی یاسای دەزگای زیندانیانی سیاسی و هاوتاکردنی مووچەی زیندانیانی سیاسیی هەرێمی کوردستان لەگەڵ عیراق، بڕیارە وەفدێکی حکومەتی هەرێم بە سەرۆکایەتی وەزیری کاروباری شەهیدان و ئەنفالکراوان، سەردانی بەغدا بکات.

ئەحمەد مام ڕەسوڵ بەڕێوەبەری گشتی لە وەزارەتی کاروباری شەهیدان و ئەنفالکراوان ، ڕایگەیاند: دوای ئەوەی لە کۆتایی مانگی هەشتی ساڵی ڕابردوودا، یاسای دەزگای زیندانیانی سیاسیی عیراق لە ئەنجومەنی نوێنەران هەموارکرایەوە، بڕیارە وەفدێکی حکومەتی هەرێم بە سەرۆکایەتی وەزیری کاروباری شەهیدان، بۆ گفتوگۆکردن لەبارەی جێبەجێکردنی یاساکە سەردانی بەغدا بکات.
 وتیشی: بەگوێرەی هەموارکردنی ئەو یاسایە، ماف و شایستە داراییەکانی زیندانیانی سیاسیی کوردستان هاوتای ناوچەکانی دیکەی عیراق دەکرێت.

ئاماژەی بەوەشکرد: بەهۆی ئەوەی جێبەجێکردنی یاساکە لایەنی دارایی تێدایە، بۆیە پێویستە پڕۆژەیاسای بودجە لە ئەنجومەنی نوێنەران پەسەندبکرێت، بەمەش شایستە داراییەکانی زیندانیانی سیاسی لە سەرانسەری عیراقدا هاوتا دەکرێت.

PUKMEDIA