سەرۆككۆمار: سیاسەتی یەكێتی فاكتەری سەقامگیریی كەركوك و عیراقە

راگەیاندنی نزار ئامێدی، سەرۆككۆماری عیراق

پێشوازی سەرۆككۆماری عیراق لە ئاسۆ مامەند

نزار ئامێدی، سەرۆككۆماری عیراق، لە بەغداد پێشوازیكرد لە ئاسۆ مامەند، سەرپەرشتیاری كەركوك - سەڵاحەدینی یەكێتیی نیشتمانیی كوردستان.

لە دیدارێكدا، كە هەرێم كەمال ئاغا، سەرۆكی فراكسیۆنی یەكێتیی نیشتمانیی كوردستان لە ئەنجومەنی نوێنەرانی عیراق تیایدا ئامادەبوو، دۆخی گشتیی وڵات تاوتوێكرا و دڵنیایی درا لە بەردەوامی هەماهەنگی و هاریكاری نێوان لایەنەكان كرایەوە بۆ سەرخستنی پڕۆسەی سیاسی.

هەر لە دیدارەكەدا، ڕەوشی كەركوك، گفتوگۆی لەبارەوە كرا و سەرۆككۆماری عیراق ستایشی ڕۆڵی یەكێتی و ئاسۆ مامەندی كرد بۆ لێكنزیكردنەوەی لایەنەكان و ڕایگەیاند: ئەم سیاسەتەی پەیڕەو دەكرێت، فاكتەری بەهێزی سەقامگیری و ئارامییە، نەك لە كەركوك بگرە لە عیراقیشدا، چونكە قبوڵكردنی پێكەوەژیانی نەتەوەیی و ئایینی لە شارەكەدا لە خزمەتی كەركوكێكی ئاوەدان و خۆشگوزەرانتردا دەبێت.

لای خۆیشیەوە، ئاسۆ مامەند سوپاسی پشتگیرییەكانی سەرۆككۆماری عێراقی كرد و ڕایگەیاند، بە پەرۆشەوە كاردەكەن بۆ خزمەتكردنی كەركوكییەكان بەبێ جیاوازی دەمانەوێت هەموو هاوكارمان بن تا بە پڕۆژە و كردەوە، خزمەتی زیاتری شارەكەمان بكەین.

PUKMEDIA